新出長遠房屋策略報告，可以睇到政府力推賣公屋最大既政策悖論，在於話幫普通市民買到樓既迷思。講到「綠置居」市價42折好似好so益街坊，但係對合符申請公屋資格既人黎講，要佢成200-300萬拎20-30年供間公屋根本係unaffordable，除非俾佢拎出黎轉讓再炒，但一俾佢炒就引大班炒家入場借名炒綠置居，你會見到排哂隊抽籤買，但最尾真係幫到普通市民既機會係好低。
然後你話公屋有好多富戶唔係基層，其實佢地買得起，咁做乜我地既公屋政策唔收佢貴啲租，而係要拎公帑補貼佢買? 咁你係幫到買得起樓既人而唔係普通買唔起樓既市民解決居住問題。
「綠置居」明明就係幾百萬先買到既公屋質素私樓，政府依家就偏要定義佢做要買先有既「公屋」，即係話，以後政府一間廉租公屋都唔起，全部公屋都要幾百萬先買到。刻意混淆定義既後果，就係政府以後會成日話自己已經起好左多「公屋」，間接係將租住公屋既供應封頂，最後反令普通市民要額外花更大既成本在居住問題之上，而你又咬佢唔入。
同埋當呢個賣公屋政策恆常化，可以預視以後市區包保再見唔到窮人，例如長沙灣新起既公屋政府都會傾向轉成為賣，即係以後窮人唔該住去天水圍，住唔起就住番大灣區，市區空間既階級化將會全速展開，未來既市區舊公屋重建起番預計都會朝呢個方向進發。
有綠置，冇窮人，解決普通市民居住問題最快捷既辦法，就係令佢地在面前消失。「綠置居」包裝到好似好受歡迎，好多人去當抽獎咁抽籤排隊，但本質上同林鄭公屋封頂、在香港實行低端人口管理既政策無分別。
租住公屋過去作為社會保障既根本，經濟十年八年一次好壞，市民唔會死得係因為至少有瓦遮頭，今天終於俾呢個地產利益主導既政府消滅。其實見到班王于漸、團結香港基金、林鄭既思維，唔係估唔到有咁既一日，只不過係香港自67暴動後租住公屋正式恆常化量產化到今日零散化含糊化，「50年不變」對香港真係一個好可怕既幽靈，無處不在。