個標題咁無稽你都肯信click入睇，你心底裹都同意個運動宜家搵唔到方向，對唔對？你無橋，我有。轉頭開估。
雨傘革命革吓革去到今日，去左樽頸位，唔上唔落，無它既，捉到鹿唔識脫角。首先，我地既對手唔係黑警，唔係689，而係共產黨。共產黨係一個史冇前例，究極血腥既國家機器。不過記住，佢只係部機器。機器係有bug既。
呢部機器work到咁多年，靠的只係一個程式，叫二元對立（antagonism），寫個位係毛澤東，成個程式，簡單d講就係四隻字：敵我矛盾。想深究請先行睇佢篇矛盾論，黑格爾馬克思辯證法，加少少莊子齊物論。點勁？佢寫完個程式，殺左幾千萬人大家都仲叫緊佢親愛的毛主席，幅車頭相放緊係天安門。
個程式點運作，沈教授講得比較深，直接d講，就係靠唔停咁標籤一小群人，妖魔化佢地，再透過將呢樣野上升到一個國家安全，民族大義既政治層面，從而孤立對手，拉攏群眾。
好違憾，只要國家一劃好呢兩個二元對立既大圈圈，套哂d人之後，大部份人都會慢慢自動行入國家政府個大圈圈。呢個係中國人近百年的緊箍咒，萬試萬寧。因為人性兩大弱點：權威畏懼，權威祟拜。中共從頭到尾只得呢招敵，由大鳴大放，三反五反，文革，64，到宜家藏獨，台灣，香港政改，都係同一個程式，同一個logic。因為只要一變二元對立，變成國家安全問題，成部國家機器就可以做到野。
中共遇到問題，係唔會去搵個solution，而係劃圈，套啲人做敵人，團結大多數，打擊絕少數，等你地自己人打自己人。抽象？咁諗下點解個啲建制派咁鍾意講沉默的大多數，咁鍾意分佔中／守法大多數市民，分年輕人／非年輕人，分支持警察／反社會秩序？因為佢地最想將全部人政治化哂，樣樣野都拉到國家安全問題，分化群眾。一旦二元對立，矛盾出現，佢就可以大條道理打壓你，非黑即白，迫全世界表態，係圈內既人都會無左思考空間，只有yes or no。文匯，人民日報開口埋口人民人民，話你動亂，港獨分離分子？你估佢真係同你地講？佢係統戰緊背後十幾億人，唔劃圈，唔政治化，點建立矛盾？
佢一劃好個圈，就可以控制到你思想。呢個國家機構掩飾既建構暴力，係好難拆得開。點解？有冇試過好辛苦講明點解要抗爭，啲人都係話一句講哂你地犯緊法嗎！因為二元對立最簡單，直線思維，一開口就多數人少數人。我地面對緊係一個制度暴力。佢每分你一次二元對立，制造一次矛盾，你就少一批戰友，七一遊唔遊行，佔唔佔中，衝唔衝擊，每次有事件，佢做既野就係分化你地。只要你一被套入左個思維，你就只有直線思考，只有不停向前衝。689係咁挑釁你，就係想激起市民內部矛盾，分化你地。你愈諗唔暴力／行動唔升級可以點迫到政府，就愈發現身邊愈少人肯出哩，愈哩愈迷失。個logic推到最後，你就會發現根本要推倒成個共產黨先有民主，然後原來得一個人做唔到。
不升級即和理非非？咁你玩LOL會唔會一開始直線衝去對方大本營？唔好沉醉係一個眾人皆醉我獨醒既狀態，宜家係玩政治，唔係打三國無雙。香港得七百萬人，推得倒香港政府推唔倒中共。港交所一早電子化哂，你點圍都開到市。冇話衝就鳩，不過如果你衝係因為諗唔到其他辦法，唔該stop一stop呢個衝vs鳩坐的偽命題。因為你一咁諗，見香港人分化哂，689就最開心。
對唔住都要講聲，而家雨傘革命的兩大發展方向，一係絕食自首做聖人，一係衝政總做烈士。聖人同烈士，係呢個網絡化，世俗化，去魅化既二十一世紀，係out out 地。兩樣個成本都太大，普及唔到去其他支持者。點解而家警察日日SM示威者，肯出黎既人都去唔返928個數？黑警做咩都得，唔係你理虧，係因為你人少。你愈激，你就愈少眾。咁樣，只會孤立左自己，變成一群有志之士既最後悲歌。
重點係，個方向唔係將個運動升升升到一個偉大既抗爭高地，而係完全相反，將運動降降降到一個極簡單的日常行為。符號化佢成為一個抗爭既LOGO。而家鳩嗚行動已經係一大進步。因為已經符號化左落旺角行街＝隨時重奪馬路。係呢個網絡世界，愈簡單既野，就愈易引到愈多人做。你叫人圍政總食警棍，同你叫人落旺角鳩嗚，根本就兩回事。
但鳩嗚都未降得夠低，因為兩點：1 只限旺角，2 只限香港人。要嚇到中共，就要再政治化一樣簡單到任何人，連大陸人都做到拎到既野。而後不停不停咁政治化佢，重覆一千萬次。例如拎住把遮行街。唔錯，係拎遮行街，I recap in English: Bring umbrella down street。有冇效，唔關個行為事，而係點吹大佢。搞左60幾日，絕對有足夠政治能量政治化把遮。當然政治化把遮仲有好多方法，拎把遮行街可以做好多野，愈誇張，愈吸眼球愈好。叫埋台灣幫手，ice-bucket challenge咁玩。然後，重點重點，然後，日日送遮俾國內自由行，俾佢地知拎遮就＝抗共。鼓勵所有民運人士，維權律師拎遮行街。推到國內遮都唔search得，推到公安一見有人拎遮係街都緊張。
拎遮or not，this is a political question. 呢部只有分敵我logic既中共機器就會過份緊張，就會捉錯人，就會hang機。佢呢個二元分立既bug，就會出左哩，個圈，就會唔知點套好。當人民日報，cctv都叫人唔好拎遮落街，就成功左一大步。當然如果佢地唔回應，就假戲真做，吹到雨傘為號，全民起義。愈政治化的政府，就愈杯弓蛇影，愈驚呢招。當白血球的草木皆兵的時候，就會變成血癌，機能不攻自破。當然我所提出既係大方向，拎遮行街只係例子，實際要大家習思廣益，加埋各鍵盤戰士全面出擊先有效果。
總之，淨係諗1789年個套革命模式已經唔work。1984都過左三十年la。覺得唔work唔緊要，當有人去衝擊，有人絕食緊，其實個抗爭模式可以多元啲，創新啲，最好好似病菌咁，會自己散播開去。你諗下諗下，就會發現政治鬥爭，都係一套Marketing。
香港人最叻既野，唔係Marketing咩？