（獨媒特約報導）經民聯葵青區議員譚惠珍以6千元月薪聘請全職議員助理，吳小姐在9月入職，發現工作內容和原定的有差別，最後在上星期辭職，但譚惠珍至今仍然欠薪「唔出糧」。譚惠珍回應獨媒電話查詢時表示，對方是抹黑和重申自己沒有拖糧，更指出於同情心聘請對方，「對方好衰格」。
吳小姐是青衣長安邨的街坊，因為媽媽認識譚惠珍，經介紹成為對方的議員助理。吳小姐稱，譚惠珍開宗明義對她表示工作範疇主要是文職，不需要擺街站，「佢話啲阿姐唔識電腦，由我負責」
吳小姐在上班第一天感到「中伏」，指電腦內沒有購買Microsoft Office，更發現裝有遊戲「英雄聯盟」。「最忙就可能係選舉嗰個月，你只需要做文職、設計橫額。」吳小姐在見工時，譚惠珍指工作不設試用期，為短期合約直至十二月，更稱「經民聯出糧，萬一蚊一個月，如果我12當選之後就繼續，唔係就十二月完」。
譚惠珍：吓，佢唔係咁呀嘛
記者向譚惠珍查詢，她先稱，「吓，佢唔係咁呀嘛。」譚惠珍斥責對方是抹黑，認為只是溝通上有問題，「我哋無咩幾份嘢打，叫佢打一份文件，唔通就淨係打一份咩？」
譚惠珍解釋稱，「萬一蚊係由經民聯直接聘請」，但需要時間作面試。記者對譚惠珍查詢，「吳小姐是否六千蚊全職」，譚回應稱「我唔知係全職定兼職。佢有兩個鐘食飯嫁嘛。」她強調議員助理的工作有彈性，「返四個鐘半工㗎咋。」
吳小姐原本是收費電視的推銷員，因為想轉換工作環境，遂離職成為譚的助理。吳小姐指在見工時，譚惠珍曾要求她在9月2日上班，但遲遲沒有確認。吳小姐及後向譚查詢，譚惠珍稱「唔好迫我，要等經民聯」。
譚惠珍在8月28日對吳小姐表示，「不如唔好等經民聯，我俾六千蚊你算」。吳小姐遂在9月2日上班，指「區議員唔會知法犯法，等經民聯出萬一蚊」。
吳小姐最後被安排「派嘢」，包括對街坊大派雪糕、月餅、汽球和環保袋，和原定的工作內容有所出入。她透露，譚惠珍共有3名議員助理，包括2名全職及1名兼職，「同原本話要做嘅嘢唔同囉，文件又變咗阿姐做」。她曾向譚惠珍提出，「我唔係做文職嫁咩？」譚惠珍沒有正面回應。
吳小姐質疑，工作性質和原先的口頭協定不同，而且月薪竟只有六千元，「我真係諗住經民聯會俾錢。」她更被安排落區到派傳單，並遭其他同事不友善對待，「迫我派，但連去邊度派都唔講。」吳小姐在街站期間以whatsapp 對譚提出辭職，譚惠珍曾反問「做咩唔開心」，但至今尚未出糧 「1,500元都唔出，好cheap、計到好盡。」
被指常對街坊講粗口 譚惠珍：只是講俗語
譚惠珍自1994年起當選葵青「安灝」區議員，今年更受勳獲得銅紫荊星章。經民聯曾派出萬子殷落戶該區，但最後「撤回」，區內已再沒有譚惠珍和萬子殷的孖頭橫額；預計譚惠珍將再爭取連任。
吳小姐慨嘆遇人不淑，又透露譚惠珍「唔好老脾」，「佢話夜晚叫『光復香港』個班仆街嚟，嗌乜春嘢，搞亂晒。」她指譚惠珍回到辦事處時常常講粗口，「有次辦事處門口盞燈壞咗，街坊多口話『無交電費呀』；譚惠珍對個街坊講稱『關你撚事』。」
譚惠珍對獨媒記者澄清時說，自己只是講俗語，沒有講粗口，「唉，我自己真係好錯，請咗啲咁嘅人。」她炮轟對方「有病」，表示近日頻頻遭到抹黑，屋苑內的橫額遭到破壞，「我先係被人粗口鬧嗰個呀！」
記者：麥馬高