屎波，比茅波更可怕，因為賴地硬，不檢討，唔知輸乜。告急牌用到爛、關鍵牌用到殘，上次姚松炎出事，今次九西又行呢一套，以為泛民「大佬」傾巢支持就會贏。由鄭泳舜到陳凱欣，中共除咗識得掌心雷，仲識搵呢啲好眉好貌懶係中立嘅人出嚟，泛民，有冇諗過點拆？叫人陳健康，其實真係有游離選民厭咗政治，buy 呢隻款。
你估歡樂滿東華，搵班星出嚟叫人齊心賑災就得咩，當日一見呢個陣就冇眼睇，何況呢班大老所謂號召力仲有幾多？
打死本土派嘅驕矜嘴臉，在議會工作乏善足陳，萬年拒絕新人上位，一日唔認錯，一日唔改進，一日選民都會記在心。果啲唔係焦土，而係選民有記性，擇善固執。
新東補選其實已碌爆卡，當日好多選民無知被人忽悠，就係投俾大局為重呢個意識形態。
我身邊好多朋友，呢幾日大聲疾呼叫人投李卓人，我都費事鬧爆，相信好多同路人都一樣諗法。唔係大局為重，而係點都唔醒，呢班人仲停留昔日，唔明你唔懲罰所謂泛民，只會死得仲快。投意識形態，保住一席，保住點票，有何作用，之前大家都見到。
人哋擺明仆街打茅波，你想贏，就要諗計（DQ除外），擺出一幅大義凜然嘴臉咁輸，一樣係輸，而且令人寒心。係咪冇得贏？唔係。但唔會係呢班人。
3月大好良機，換來當頭棒喝，結果再輸一次「單對單」補選，泛民完全失卻分組點票否決權。就算香港唔會俾候選人高呼打倒中共，但也應該向呢方面埋手，搵後生仔，新面孔，聚焦如何不被赤化，效果會好得多。
2020，仲有兩年，即管睇吓點。唔講咁遠，聽朝瞓醒，睇吓泛民應對，都會見到端倪。