香港前幾年討論既土地問題，基本上可以綜合為以下的對答：
● 你話香港所有問題都係源於香港冇地，不理民意搵埋劉華強推萬億人工島先攪得惦，就俾人數到500塊共300公頃市區大片臨時官地曬太陽，1,500公頃棕地有成3分2冇計劃點發展；
● 然後你話發展棕地好難，又答唔到你唔直接收地產商上1,000公頃囤地，反過來用公私合營方式夾埋益佢地起豪宅；
● 你話收地產商囤地係侵犯私產，但對啲小市民就隨便粗暴強收，收完又再起多啲天價豪宅；
● 你話我都有收有錢人170公頃個粉嶺哥爾夫球場起公屋，但最後只係其實收左5分1都冇，另外整體成400公頃私人會所地繼續享有土地特權；
● 你話未來會好公平咁分7成單位做公營房屋，但你同時又封廉租屋頂變哂綠置居同居屋，賣間400呎居屋都要成300萬。
● 你話政府起樓都要自負盈虧先惦，但賣地一年都賺左成千億，用200億落去幫發展商買60個鋪都唔拎多啲地起多啲廉租屋；
● 你話有左1,000公頃人工島就可以起多啲公屋俾香港人住，但又原來又想建議搵地產商直接填島造地起豪宅，同埋定位配合大灣區引進內地專才；
● 你話咁樣「投資」人工島高價賣地先唔會蝕錢，但明明一開始話係解決樓價貴同冇屋住，講到底，原來又係繼續玩土地壟斷分餅仔，造得愈多壟斷愈勁；
成日話冇地就萬萬不能，總之支持政府整個萬億人工島就解決哂你衣食住行。呢個土地萬能論，真係堪稱係香港數一數二既世紀謊言，同一國兩制有得揮。