我好細個就跟爸爸媽媽去六四悼念活動，因為當年佢地係八號風球上街嘅一份子。兒時不識歷史嘅沉重，返到屋企仲不斷唱當時晚會嘅歌曲，完全係「商女不知亡國恨，隔江猶唱後庭花」。
　
直到有一年，可能大個多少少，聽到台上不斷咁讀出一個個人名，開始意識到甚麼是死亡，開始知道讀出嘅係一個個死亡嘅名字，而嗰啲人都唔係大我好多。開始我拒絕同爸媽去晚會，覺得驚驚，直至到返高中，先再重新認識呢件事。
　
記得大學時期有一晚，問父母，當年我未出世嘅嗰一個晚上發生係咩事，佢地到底點睇六四。然後我老豆默默地喺一個書櫃嘅角落，拎起一個好普通嘅粉紅色膠Folder。
　
佢話：「我當年keep住哂嗰段時間嘅報紙剪報，咁而家就交比你睇啦。」
　
個Folder成本字典咁厚，當中由1989年4月開始。我當下其實唔識反應，亦都無好認真睇過入面每一隻字。
　
我諗人類都係咁，趨樂避苦，太沉重嘅嘢有時好難鼓起勇氣面對。但人愈大愈明白，所有嘢都係話語權嘅鬥爭，係由記憶與被遺忘嘅掙扎。我同所有年青人一樣，都質疑過六四晚會仲有無人，但我覺得你一定要記得呢件事，尤其係當當權者要你遺忘嘅時候。
　
當然你要來的話，維園見，我在銅鑼灣E出口迎接你。