如是者，政府又話要搞對話平台，又叫晒啲自稱中間的人出來對話。雖然一見個名單，橫睇掂睇都似「皇族內閣」多啲。
如無意外，呢啲所謂平台只係走過場，俾個理由政府覺今是而昨非，有個落台階咁解。再下一步先見真章。
個問題係，連個平台都咁 hea，你覺得佢之後會唔會真讓步，還是搭個台出嚟呃鬼你呢？
驗真假，好簡單，要睇權力。呢排太多人建議乜乜物物委員會，天花亂墜，其實都係掩眼法。要問有冇用，最緊要就係要問：係咪按法例成立，有法定效力的調查委員會。
如果唔係，我話知你叫乜名，又話知你邊個做主席，就算你標童標包公同林肯上嚟做委員都好，都唔會有用。
九月都嚟緊頭喇，你唔想解決問題咪區議會見囉。到時一鋪清袋輸過百席選委，民主派加李氏力場隨時選委過半，我睇下你點算。
市民訴求一直都好清楚，係法定的獨立調查委員會。呢個要求已經好卑微。但唔係吹水會呀唔該。