幾個星期前收到屯門區議會《環境、衞生及地區發展委員會》文件，其中有一議程係諮詢區議會對食環署向三名「線面師」發小販牌的意見。政府發小販牌咁好死？
翻查文件，發現食環署是根據2015年3月2日《立法會食物安全及環境衛生事務委員會小販政策小組委員會》文件《小販管理建議》製訂有關從新發小販牌政策。文件指因應社會環境及市民價值觀改變，並參考海外經驗後而重訂小販作為一項經濟活動模式的政策。
根據文件指出，發牌並不是無條件的。文件一方面肯定推動本港經濟多元化是值得追求的目標，因此，擺賣活動不應被禁止；但另一方面擺賣亦不可與公共政策有所抵觸；今天食環代表就指出，有關擺賣不可影響環境衛生及街道安全暢通。所以，政府現階段會先向具有懷舊本土文化特色的無牌街頭工匠（包括補鞋匠、鐘錶修理匠、線面師及代書人等）發牌。
其實有關政策有很多不妥當的地方，例如選取發牌給誰不發給誰的準則如何呢？部門有否做好各種工匠區域分佈的資料庫呢？如何確保沒有人被遺漏呢？攤當面積訂於0.9米 X 1.2米會否太細呢？$3,458牌照費釐訂準則如何呢？問題，還有很多。
可是，如果你是一名支持社區經濟、支持經濟生活多樣性、支持傳統技藝承傳，或者簡而言之支持小販的話，對有關文件及政策縱有不滿及疑問，但總會視為一個開始，而不會明目張瞻反對吧！
但係，今日就有人於會內反對食環署建議向三名在屯門區內的無牌工匠（線面師）簽發固定攤位（工匠）小販牌照，建議被拖至下次會議代部門交待發牌準則及全盤計劃才再討論。
我失望，亦不認為再討論就會有結果。觀乎反對者的理由——「開咗個頭，以後個個都擺就難管理」、「日矖雨淋擺街唔好嘅，安排去上街市啦」、「今日擺個檔聽日搭個棚都得啦」……說到尾，其實就係唔好擺响我個區，情況就像起公屋我梗支持架，不過唔好起响我隔嚟！
開完會，躁躁地，直接走去找其中一個線面師父傾偈。師父叫好姐，據她所講擺檔至少七八年了，她直認有向部門申請小販牌。不過，老人家就是謙虛。當我道出開會時的爭議，她就三番四次話「哎吔，咁算啦，唔好搞到你地麻煩啦」接著就是連續十五分鐘身世剖白，由在大陸學懂線面手藝，到七十年代嫁來香港做艇民，再到在筲箕灣擺檔在人家婚禮獻藝，再到湊大仔女家陣抱孫……說到底，今日還出來擺檔就是可以靠自己技能過日晨兼可討點收入罷了！
我從未試過線面，亦沒研究過線面技藝的文化價值有幾高幾深。我只知道，難得官僚機構肯嘗試開綠燈讓小販存活，我們就應當嘗試將這實踐起來，讓社區多元經濟先打開個缺口。萬料不及，連這微小的一步都被打沉。
同阿好姐傾完，她反而沒有太多唔開心，只係重覆又重覆「唔好搞到你哋咁煩」。然後，她就叫我再找天來試下線面，「包保你仲靚過而家呀」。吾吾，開懷，冇咁躁。
不過，想到點樣繼續撐住，想法還多﹐有點雜亂，但好有衝動找出屯門每一位小販工匠，做個資料庫，然後同你班人再慢慢砌。