我係廢青選民，呢兩日網路上除左充斥著大量選舉論壇之外，就係本民前同熱普城嘅爭論，事情起緣於黃毓民拍左條片話梁天琦唔幫鄭錦滿站台，但係去九龍西幫游蕙禎拉票，仲話佢係政棍。
睇完呢段片，當堂嚇一跳，然後得啖笑。大佬呀，你地熱普城講要永續基本法，人地就講到明係同梁天琦聯手，光復香港，時代革命，要香港獨立，理念完全唔同，憑咩要幫你站台? 舉個例，劉備會唔會幫曹操宣揚「挾天子令諸候」呀？係絕對唔會，而且天公地道。黃毓民咁做，就等如係屌鳩劉備唔幫曹操一樣，邊個理虧？
點知件事仲未完，鄭松泰係網台節目又係咁鬧，有幾個位真係令人啼笑皆非。首先，竟然話黃毓民年紀大，今次係最後一年參選，點解要佢咁辛苦，點解要同佢爭？哦，得佢先辛苦，黃俊傑、游蕙禎、王百羽、陳澤滔、梁天琦、梁頒恆就唔辛苦？咁唔通人地要同你講：「喂，黃毓民都做過立法會議員啦，不如退位落嚟，讓比其他人啦」，但係人地無囉，代議士係有能者居之，唔係好似你班熱狗咁去主動攻擊本民前同青政就會有票囉！
然後，又話梁天琦等人後生，大把時間有得參選。梁天琦而家咩環境呀，選都無得選啦，官司都未完，一日港共政府存在，一日都好難再參選，談何容易？講真啦，未選到已經要攻擊本民前同青政，鄭松泰仲要話你地五區入晒立法會，就會辭職引發公投，敢問有邊個會相信呢？
當日話就話兄弟爬山，各自努力，直到發覺人地威脅到你個議席就講咩都假，最緊要拉你落馬，呢啲就係熱狗本色? 雖然我係一個廢青選民，但我都好厭惡熱狗呢種所作所為，呢篇文唔係要謾罵，只係以事論事，不吐不快。
在此呼籲，九月四日，請去投票，All In HK，光復香港，一定要贏！