梁振英早前又衝出黎__，質疑香港外國記者會（FCC）以象徵式租金，獲批政府物業做會址，旋即FCC前成員反駁指會址月租達55萬元，林鄭事後亦澄清是市值租金。然而，梁振英及後仍死雞撐飯蓋，話FCC的租約是政府直接批出，堅持若FCC認為並非獲政府資助，應放棄租約，再以公開競投方式租用。
如果咁覺得象徵式租金同冇公開招標咁有問題，梁振英你任內點解唔立即收番拎特惠租金既粉嶺高爾夫球場重新招標？自己友就圍爐賤租公有地，睇人唔順眼就用張租約黎威脅人，唔怪得香港人咁痛恨你呢位落任特首。
至於親疏有別最經典既案件，莫過於兩年前梁振英任內批出由梁振英夫人梁唐青儀擔任總司令的「香港青少年軍」特惠土地。明明剛剛成立、成員甚少、但夠紅底，就擊敗左其他更資深同會員人數更多的團體申請，以月租1元得九龍灣一間3萬平方呎空置校舍，哄動一時。相比起FCC，青少年軍先係真正享用象徵式租金，挪用靚地益哂自己友。
圍爐唔單只可獲$1租封地，當年身兼青少年軍榮譽顧問的劉江華更「自己批自己」，他擔任主席的華永會，曾「特別批核」3,000萬予青少年軍翻新校舍，個deal分分鐘重正過UGL。梁振英你在任個陣批塊地俾自己人，唔駛點交租重有墳場提款機(華永會)特別送舊錢你賺，你今日重好意思質疑FCC交市值租金?
由此可見，民間團體租地向來不以價高者得方式競爭，關鍵反而是政府部門的支持和審批準則，又或者好睇長官意志。只要是自己友，即使公開競投，都好容易出現私相授受和「特事特辦」，向友好團體輸送大量資源。但一旦得罪政權，就隨時被「溫馨提示」，以租約作威脅，變相成為政府拑制言論的方法，變相成為另一種土地霸權。