中港地產商同工程公司虎視耽耽嘅**一萬億**東大嶼填海肥豬肉就快有得分，除咗「偽民間特首」劉華衝出黎撐之外，平日好似幫基層、實質同政府同「團結香港基金」老友鬼鬼嘅社區組織協會都出埋黎撐。今日社協代表吳衛東就喺電台節目話支持董建華帶頭的「團結香港基金」提出嘅東大嶼巨型填海計劃。
咦，但睇返上個月社協自己做嘅問卷調查，話訪問咗150位劏房租戶，結果係78.7%受訪者贊成發展棕地、贊成利用私人遊樂場地契約用地及私人的新界農地儲備均為67.3%、贊成重置或整合佔地廣的康樂設施則有58%。而最重要係，贊成發展東大嶼都會只有44.7%，不。足。一。半！
明明係自己做嘅民調，訪問返啲成日俾林鄭同團結香港基金擺上枱嘅劏房居民，點知劏房戶都無俾你哋呃到，支持發展棕地同高球場多過填海，於是就唯有當無事發生，自己出嚟話撐東大嶼填海。咁個民調做嚟做乜呢？究竟有無尊重過基層居民真正心聲？
對於最短期可用又提供到大大塊地嘅「收回粉嶺高球場」選項，社協何喜華就頭搖又尾擺，上月先喺公開論壇話「反對所有高球場的發展」，之後又硬撐話因為高球場對生態有影響、佢其實係「反對所有高球場的存在」。好啦就當你真係好重視生態環境，咁點解而家又不問生態影響、水流影響、氣候變化危機、成本高昂等問題，就衝出黎撐東大嶼都會？
社協咁耐以嚟只係跟住政府支笛，話基層住劏房咁慘係因為土地供應不足，所以就盲撐造地。至於地產商囤地、土地被壟斷、棕地被浪費、丁地被鎖住、閒置官地被隱藏、炒樓投機嚴重，通通都當睇唔到。但明明呢啲先係造就貧富懸殊嘅元兇。仲有如果真係搞東大嶼，政府就要預成萬億賣地收入倒落去填海，更加大條道理話無資源搞好基層醫療同福利！口講為基層，原來係選擇性失明喎～
回帶：
2018年7至8月 社協對劏房戶進行問卷調查
2018年8月18日 團結香港基金黃元山向社協推銷「強化東大嶼都會」計劃
2018年9月25日 社協發佈問卷調查結果，不足一半支持東大嶼
2018年10月8日 社協代表吳衛東於電台節目表示支持東大嶼人工島計劃