1）林鄭收到北京order，要引導300幾個內地貪腐土豪連同黑金送回大陸，我估北京冇指明用乜方法，林鄭咁打得實有計嘅；
2）林鄭見有台灣殺人案做幌子，簡直千載難逢，馬上修改逃犯條例，只用20日公眾諮詢，心諗有「道德擋箭牌」加「快刀斬亂麻」，一定掂；
3）點知商界嚇到反枱，政府唯有剔除9項商業罪行（呢個係成件事最荒謬之處），以為就可以順風順水；
4）但上到法案委員會，泛民由選主席開始拉布～本來由得佢地拉，拉多一兩次點都要選主席，咁一選，主席自然係建制派，咁成個timeline就掌握喺建制手中；
5）點知政府可能太過目中無人，又或者太心急，竟然想出填memo選主席呢個違法違憲嘅方法，兒嬉過小學選班長，喺毫無法律基礎下唔敢同泛民硬撼，於是想出直上大會二讀呢個起碼係合法嘅方法；
6)）喺4）同5）期間，發生咗好多對政府不利嘅事，例如台灣多次明言唔接受修例，香港出現咗政治難民亦加添港人同國際嘅憂慮，另外隨64三十週年迫近，三十年前中共嘅所作所為又重新不停loop，直接增加市民恐共情緒，對政府修例所作嘅承諾，冇人敢信；
7）而萬萬估唔到，美國國會同歐盟竟然出聲～其實稍有常識嘅人都估到，大佬，修例係直接影響外國人嘅人身同財產安全，梗係要出聲啦～偏偏，就係林鄭政府估唔到。
8）點解林鄭估唔到？因為佢目光如豆，零國際視野，眼中只見北京北京北京，佢只知呢個係北京order，佢夠票就得，其他嘢完全唔理，所以至今唯一讓步都只係為商界，因為商界有票。
9）歐盟出到外交照會，係好高層次嘅抗議，但鄭林簡直義和團上身，以為自己有神功護體真係刀槍不入，當人地耳邊風。最極品係諉過於對方畀人誤導～一個關乎外國人在港利益嘅修例，竟然完全冇諗住主動同外國解釋、游說，而係等到人地被「誤導」之後，先急忙被動地自辯。只係呢一點，已反映林鄭之無能，同時亦好傲慢。
10）事到如今，本地法官都出聲，原本好簡單嘅一件事（林鄭覺得）已演變成國際醜聞，雖然修例一定有北京嘅意志，但咁攪落去，死撐嘅成本大過撒回，所以，下次遊行嘅人數就更重要：如果得10萬，然後翌日林鄭話擱置～咁嘅劇本我講出嚟都唔通順啦，咁如果有100萬人呢？呢個就係我一直覺得6月9日一定要行出來嘅原因！