上星期睇完《消失的檔案》，真心要多謝羅恩惠導演同所有出力支持過呢段片嘅人，還原咗當年一部份真相，令大家可以知道六七暴動嘅前因後果，以及中間鮮為人知嘅過程。當製作團隊嘗試去香港檔案館去搵當年記錄時，只係發覺得番寥寥可數而且無關痛癢嘅文件，應該要有嘅記錄，例如係少年犯資料、傷亡人數、被捕名單、牽涉組識等全部都不翼而飛，懷疑有人唔想俾市民知道當年發生咗咩事。於是，導演就決定將調查角度拉闊，想更宏觀地重現真相。
六七暴動始於1967年4月人造花廠勞資糾紛事件，左派工會介入煽動工人係廠外寫大紙報同埋貼毛語錄，係都傾唔掂數，結果勞資雙方衝突而有人受傷。《大公報》社論開始將事件政治化，親中報刊更將事件解讀為係港英殖民政府迫害中國民族，號召香港市民上街對抗，打住「反英抗暴」旗號，當時嘅港澳工委（中聯辦前身)更加成立「港九各界同胞反對港英迫害鬥爭委員會」（鬥委會），號召左派報館、銀行、國貨公司，甚至係學校每日去示威同集會，之後更加製造同放炸彈，轟動一時嘅案件就係北角清華街炸彈爆炸殺死咗2個小朋友及商店廣播員林彬被殺。整個暴動，都係周恩來同相關共產黨員係背後策劃！
當時鬥委會無所不用其極咁煽動民眾同洗學生腦，帶起文革式批鬥，好多造炸彈同放炸陣嘅人都係學生同左派學校老師，計計條數，呢班人就係今時今日開口埋口話自己「食鹽多過你食米」嘅廢中廢老，民建聯議員葉國謙就係當時鬥委會其中一位成員，曾鈺成就係香島中學其中一班嘅班主任，當年嘅暴徒今日就係香港嘅當權者，又有幾多香港人會知道同關心呢？
當時共產黨為咗持續抗爭，要求左派機構員工罷工，全力示威同埋造炸彈，佢哋會每個月畀錢呢班所謂愛國份子。所以大家係呢幾年，由雨傘運動一直衍生至今嘅抗爭，都會聽到一班港共議員以及社會上嘅廢中廢老，都會話年青人上街都係收咗錢，佢哋自以為是到一個點，就係當年佢哋點做，今時今日都係點做。可惜廢中廢老唔明白，年輕一代眼中唔係好似佢哋咁，窮得只有錢。
最近聲稱自己做律師嘅何君堯，係集會上就話要殺豬殺狗；而六七暴動時都會稱呼幫助港英政府嘅人係白皮豬同黃皮狗，更有口號話：「炸豬炸狗真英雄」。推算何君堯背景及佢嘅說話，我地可以明白佢仲係有當年文革式批鬥思維及行為，隨便扣人帽子，安插罪名，將反對聲音都統一講成係港獨，然後就可以盡情打壓。係社會入面其實仲有好多帶有呢種思維嘅人，六七暴動會唔會有機會歷史重演呢？ 我覺得絕對唔可以忽視！
呢套記錄片令越嚟越多人知道原來香港係無檔案法，咩係檔案法呢？ 以英國為例，就係立法規定官員處理事件同開會都須作文字記錄，完成後就要將記錄完整送上檔案局，然後等局長決定係咪要將相關記錄保存，到特定年期後就可以公開。而香港係未有檔案法，即係話政府官員係唔需要保存同公開任何佢哋處理過嘅文件，代表政府可以隱瞞任何佢地唔想市民知道嘅事，正如「橫洲摸底」同「鉛水事件」等，政府竟然話無記錄，絕對係荒謬到一個點，但市民想追究同問責都無從入手。
或者大家會以為1967年距離2017年好遠，當年嘅影響一早煙消雲散，但係事實恐怕唔係咁簡單，暗湧只會越嚟越大，大家都唔應該掉以輕心！