圖片來源：高登天后瓊姐【慈雲山鄭列瓊】
「衣野衣野野野衣野野野～」
利申：筆者係GEM初出道時候都算半個Fans，只係而家覺得佢歌路好似「五十年不變」先慢慢轉向，而佢幾首出道名曲例如睡公主、Where did you go，筆者都仲記得歌詞。
而睇到高登天后瓊姐令人拍案叫絕既圖先知原來GEM已經失民心到一個點：多份報章就算係時事版無論黃絲藍絲，係娛樂版對佢都係一致負評。所謂公關災難到呢個程度應該不能再差了。
回想記憶中GEM的第一次公關災難應該到數到9月27日，好似個個都衝晒去金鐘救黃之鋒，點知佢就一張自拍相再黎一句「又係一個星期六，香港人在做什麼呀？」然後下面留言點鬧佢，相信大家想像得到。筆者並唔覺得人地係自己FB開個咩post要人批准，不過有一句我真係打從心裡認同：「你要返大陸賺人仔，唔支持我都理解，咁你唔出聲咪得，做咩要開口比人鬧？」去到呢下，呢個災難已經唔係價值判斷，佢柒左已經完全係一個客觀陳述。
有咩慘過得罪香港人？就係同時得罪埋黨。唔知係咪知道自已出事，所以第2日再發一張佔領相再加句「God Bless HK」，又唔知係咪因為呢張相，過一排就比大陸列入封殺名單，搞到經理人要急急澄清：我家GEM係愛國愛港架！從此係黃絲心中又多條罪。
但經過咁多風雨，GEM並無從此淡出，反而撈得風生水起。你有你左一句「支那雞」、右一句「瘋蝗漿」，我有我繼續第2047場「X.X.X Live」由全中國玩到美加，再返黎香港都仲可以賣成2000蚊一張飛都仲爆滿，吹咩？然後再爆出佢成個show唱得六首廣東歌，仲要只接受內地傳媒訪問……但筆者仍然相信，下一次佢開show一樣會爆滿。
講到呢度，其實想講一點觀察：無論你點寫，佢都一樣咁唱，自從「我是歌手」果一排發出左震憾性既歌聲之後，正式打開大陸市場，而果張封殺名單就如HOCC所講，只係一個笑話。網民點鬧，似乎對佢無咩影響。
結論，無論做咩都係，人多才是皇道。
佢一句愛國愛港，換黎一個人鬧佢，但佢賣到十張飛。好似689咁，一句話我地外國勢力、香港獨立，話之你點笑佢，佢就係氹得掂更多人。
筆者個人並不反GEM，但反GEM的朋友們，似乎要做更多文宣去推動呢個理念，深耕細作，好似無咩意義，但為既就係要儲到足夠推倒佢既人數而做既準備功夫，唔夠人既，咩都做唔到。而唔反GEM既原因係，一者我認為評核一個歌手係應該從歌路、歌唱水準入手，而唔係政治立場；二者，深耕細作呢種咁花時間心機精神既工作，當然係留返係更直接影響生活，更貼身既問題上啦！