美國聯邦最高法院2015年6月26日判決同性婚姻喺美國各州都要平等獲承認後，Facebook 推出將 profile picture 加入彩虹濾鏡嘅功能。不論彎直，一兩日內好多人嘅 facebook 都被彩虹洗版。我突然感覺到「同志平權」好似變成年青一代之間「政治正確」嘅事物，但喺殘酷嘅現實中，同志多未感受到公平對待。喺澳門，同志遇到嘅困境有兩方面：
一、社會上
雖然近幾年國際以至香港陸續有多位名星、運動員、政治人物公開性傾向（俗稱「出櫃」），雖然對推動社會接納同志有一定作用，但相信大部份同志仍未感到社會多咗接納。同志朋友會好敏感，如果聽到朋友、家人間中同恐同言辭或者用以性傾向開玩笑，就會只會更怕被朋友、家人知道，從而更收埋自已身份。
澳門同志權益關注組（澳門彩虹前身）喺2013年頭做過嘅調查顯示，有兩成回應調查嘅同志曾經因性傾向／性別身份有自殺念頭；而同志最大嘅擔慮係，俾屋企人知道性傾向。
所以，希望支持同志不應被歧視嘅朋友，除咗換彩虹 profile picture 之外，麻煩喺日常社交圈子建立非恐同嘅環境，喺屋企入面能夠對家人嘅性傾向持開放態度，先可以減低同志所受嘅社會壓力。
二、法律／制度上
澳門有幸喺2008年通過《勞動關係法》嘅時候，喺當時冇人反對、冇人特別支持嘅情況下，將「性傾向」納入平等原則條文，若有僱員、求職者因性傾向受不公平對待，僱主可被罰款兩萬至五萬澳門幣。相比之下，單純呢點澳門比香港進步，香港同志團體目前仍向香港政府爭取緊性傾向歧視立法。
另一方面，澳門政府喺2011年主動將「同性同居」加入家暴法草案保障範圍做公開諮詢，但喺2012年底就聲稱因收到12份唔同意見，就宣佈將「同性同居」定義剔除，間接促成咗澳門第一個明言爭取同志權益嘅團體－「澳門彩虹」嘅成立。澳門彩虹多次公開反駁負責草擬家暴法嘅法務局、社工局部不斷搬龍門嘅理據後，澳門政府仍無視同志伴侶之間會出現嘅特殊隱性嘅家暴情況（例如以公開對方性傾向作為脅迫手段），企硬剔除同性冋居定義。目前家暴法仍喺立法會小組會細則審議中，據聞政府將出新文本，同志關係最終會否被納入保障範圍仍屬未知之數。現需要支持澳門同志平權嘅朋友，一齊遊說政府同埋你支持開議員積極要求恢復同志伴侶到保障範圍。
2013年頭，高天賜議員提出《同性民事結合法案》，結果大會只有提案嘅高天賜一人投下贊成票，而當時最精彩嘅係其他議員提出反對嘅「理據」，雖然幾乎每位發言嘅議員開頭都戴頭盔話「『尊重』唔同性傾向嘅人」， 但發言下文都係邏輯混亂、對性別議題無知、拒絕同志享有平等權利嘅內容，詳見 http://mcnews.cc/?p=895 。參考美國最高法院嘅判決，對世上絕大多數反對同志有平等結合權利嘅論述都有清晰同埋有道理嘅回應，我下篇再傾。
總結，長話短說，喺彩虹洗版之後，下一步就係期待撐同志朋友嘅實際行動。