我寫過好多有關感情既文章。無論係單身想追女仔、一齊之後點相處、甚至係分左手想追返佢我都有寫過下。但係我發現有時男仔將識女仔依回事睇得太重，點樣識邊個邊個或者點樣追邊個邊個基本上個個都會問過。其實識女仔即係識朋友，大家一齊返工返學，見到面傾下計，得閒一班人出黎玩係好正常既事，只係唔知點解大家都會將識異性當係追求既一部份，搞到又驚又怕羞咁，無形中將識女仔變成係一件好可怕好難既事。當大家有共同話題興趣就好自然會傾到計，就算佢係女仔都好。所以話點解要問點樣識女仔？
女神依個字聽得多，而家香港靚啲身材好啲既都會比人叫做女神。你將人地捧做女神而自己就係凡人，自自然然會覺得你地中間有好大段既差距。而一個女人當比人當神咁拜而又有一堆男仔自願化身兵同狗公，佢既虛榮心自自然然就會出哂黎，而你班兵同狗公就用盡一切方法想女神對你有好感，個個好似打機咁想搵攻略討女神歡心，其實所有野都係你地踩低自己造成既結果。如果係同性既話，你唔會有咁多顧忌：大家都係獌狗啊？即刻講返尋晚迪比點入兩粒打唒飛機；講開頭文字Ｄ？一齊講「你冇可能同我架ＦＣ鬥」。啱啱見面唔洗五分鐘拍哂膊頭，就好似失散左廿年既兄弟咁雞啄唔斷。點解對住男仔可以咁但對住女仔就聲都唔敢聲？冇計既，你係要抬高女性既價值覺得人地高不可攀，怕你自己講錯一句野就比人當係失敗者唔再對你有興趣，傾計都要諗過度過覺得咁講可以增加女神好感先敢出聲。當你既氣場都弱到咁既時候，做咩都冇可能會成功。
就當一班人新識既，新同學又好新同事又好，個個都係平等，個個都係想埋堆，根本就冇分男女。唔好一對住囡囡就鬼食泥，面都紅埋咁，咁樣一係就比人當你有做兵既資格，一係第一印像已經ＦＡＩＬ埋。個個都話樣好重要，但你知唔知比樣重要既係乜？唔係錢，係自信，信心。你講野望住人，有ＰＯＩＮＴ得黎有啲風趣幽默，不論男女對你既第一印像都唔會差得去邊。點解果個話自己係零既阿源以前咁有毒男格，而家睇返又同正常人冇分別？咪就係自信既問題囉。新同學同事交換電話有幾難？點解你問阿明拎就咁輕鬆自然，問阿玲拎就緊張到手心冒汗？咪就係因為你自動將阿玲升格做神。正如點解你老闆叫你入房你會淆底？因為佢係比錢你果個，你覺得佢大過你（事實上都係）。
你話你係上流社會，個個表面和藹可親實際上無時無刻打量緊你身家地位權力既就正常，但當大家都係書友都係打工仔既時候你又何必過份抬高人地既價值？就算阿玲人靚聲甜３６Ｄ咁又點？你見唔見阿明同佢一樣相處得好好，耐唔耐就有講有笑連一支水都可以兩份飲，而你仲係連同阿玲講句早晨都掙扎兩三分鐘先口震震咁講出口？因為阿明同阿玲既身份係同事，係同學，而你一早就幫阿玲加左個光環落個頭度。
一個讚好，是對我的一點支持。
如果想分享給其他朋友的話，請標明出處並附上專頁網址。