文：劉定堅
王維基搞電視台顯然是萬眾期待的香港盛事，普羅大眾不明白箇中情況，渴望競爭帶來進步，但行內人經年多觀察，漸漸發現這只是一再在亞視重複的有錢佬玩Game，毫無創作、製作經驗的王台長用錢為自己搭建一個華麗舞台，節目開始前，雷聲大自然萬眾引頸以待，但台前幕後專業人員心裡明白，舞台上的焦點是老闆，他的表演很用心又很賣力，但因為不專業，最後觀眾恐怕只會媽媽叉叉恥笑，王台長的故事成了大笑話，他嘛，那時自然榮登喜劇之王寶座！
有關王台長的文章可以寫之不盡，大家既然有興趣，劉定堅詢眾要求再作詳細分析：
1. 沒有TVB監制過檔
王台長強調為讓導演有機會晉升，故此不聘用TVB監制過檔，這解釋絕對是喜劇之王搞笑本色，依他的邏輯，從今開始和黃應炒咗霍建寧、英皇炒埋吳雨，全世界專業阿頭通通無得撈，呢班友仔明顯阻住下屬上位，罪大惡極！咁無聊嘅廢話都講得出，因為背後隱藏著的事實不好公開，你要請戲劇組監制過檔，當然不可能叫戚其義嗰班同grade嘅製作人原地踏步啦，監制再上自然係統領整個戲劇組的總監，王台長掟幾十億出嚟，就係要做玩家，知少少做代表，你有無搞錯，你做阿頭佢咪齋坐？總監係佢，台長又係佢，老細都係佢！佢=我們，我們是台長+總監+乜乜物物=我，我就是王台長，呢個台我嘅！
明白，明晒！其實講清楚咪好囉，又或者由我代你講嘞，我有錢，要玩電視台，要表演擊倒巨人TVB，我要搵一千幾百人陪我玩，我有錢肯定勁叻，叻就超越專業。有佢講無人講，佢唔識但佢是對的！大家不妨望望四周，財大氣粗有錢佬，自大狂妄無料到！早見慣不怪，監制不來，因為他們都人生閱歷豐富，上錯賊船豈不臨尾香，多謝嘞！
2. 貴一倍衰十倍
王台長的電視劇每集成本高到笑死人，只因為他的不專業領導，全線玩Alexa拍攝、實景製作，但budget相對非常有限，變成了愚蠢到震的制度，令經驗豐富的製作人淪為學徒，加上電影幕後溝電視幕後，王台長這新玩家自以為可以執葯砌機般打造團隊，卻不知影視融通千難萬難，結果當然是製作費飛升啦！全實景代表走景走到仆街，失去大量拍攝時間，美劇拍20日一集，製作費幾百萬美金，當然有條件，你班蛋散突然升呢，無拍美劇實力、無經驗又無充足資源，等同撞頭埋牆自殺。結果嘛，你的劇每集成本130-150萬左右，大約是TVB的製作費一倍以上，但係王台長的作品無大卡士、無大監制撐住，單以賣埠價計，個價衰十倍絕對可能，結果輸到倒水咁倒，唯一方法係減產、縮皮，所以你同時都做緊。
大大聲絕不退縮，咪撐啦唔該，我知你好有心，我明白你鬥志如虹，我都唔想你放棄，但大家有眼睇嘅，你敢依承諾今年拍六百小時劇咩？有錢佬玩電視台，大班明星、姐仔哄託，娛樂版頭條威威，風光背後仍是要面對現實，結局就係盡力縮皮，你的革命軍最清楚！但我可以話你知，你地日夜討論、研究拍美劇係浪費時間，你手上嘅師奶劇專業團隊睇唔到有成功嘅可能，出色的美劇用三機拍攝，你下面有人識咩？你有錢買Steadicam又點？三部Steadicam同時拍攝，你班導演點可能突然升呢搞得掂呢？甚至乜叉係美劇《24》嘅三機拍攝，你不妨問下有幾多人懂啦？你不尊重專業，專業便會離你而去！
老細出馬，悲劇笑話！我苦口婆心再三勸告，請王台長快快退位讓賢，找行內有經驗、有級數的專業人才坐鎮，大哥吳雨份量嘅管理人員就啱數嘞，再加埋鄧特希、劉家豪咁上下嘅專業創作及製作頭領，重新整理團隊及策略，慢慢部署，曙光自然出現。請可憐那些追隨你的數百家庭，大家都輸唔起，那些有兒有女又背叛了TVB的革命份子，那些剛出校園充滿熱誠的傻小子，你背負了數百人的夢、還有百萬人的期望，但你並不專業，你有錢便負責資金好了，創作、製作非你所長，請在市場選出適合的領軍者！唉！就算是王征，他最少還留住家寶，別執迷不悟了，還是那句老話，靜坐常思己過！膽敢面對自己的失敗，勇於改過，才是大人物、真英雄！渴望你不會如我所料成為天下人恥笑對象，當不成《喜劇之王》，一切你心知肚明，王台長非你該擁有的名銜，回頭是岸！
附注：作者劉定堅三十年前創作《蝦仔爹哋》，開創盧海鵬無釐頭金句，創下處境喜劇神話記錄的劉定堅，八十年代轉戰烽火連天的港漫市場，創作了最輝煌年代的《中華英雄》，並成為極少數的代表，只憑藉創作人身份，建立個人出版企業《自由人出版集團》，創作並出版了包括《刀劍笑》、《超神Z》、《狄克戀曲》、《賭聖》等等大批經典漫畫作品；及後進軍小說市場，《刀劍笑新傳》開創了周刋武俠小說神話，憑逾百部作品打開了中、港、台三地市場，經過長時間投入電影及動畫創作及製作，年多前開始進軍國內影視市場，身兼編劇、導演、製作人及投資者四合一身份，繼續挑戰更複雜的龐大市場，延展創作生命。