【如果真係有外國勢力】
我會話，或者兒歌同流行文化就係好影響每一代人，影響唔同參與者嘅勢力。
.
.
【90、00後的意志之歌】
問而家嘅90後、00後最鍾意咩兒歌？受咩動漫影響？
係「遇怪魔我即刻變大個」嘅《數碼暴龍》、係
「繼續上 全力上 無懼每個對手招式多誇張
不怕跌傷 要用雙腿創造 我理想
無論進 無論退 無論哪個領先都不必慌張
只管再進攻 決心奮力圖強」嘅《黃金入球（踢出我天地）》呀。
.
最影響我哋成長嘅似乎唔係教科書，係日本漫畫《少年Jump》：強調熱血、友情、正義勝利。無論係戰鬥力差幾十萬嘅悟空對菲利、考第尾嘅鳴門、擁有夢想激情嘅路飛、湘北對山王、被奪五感都唔認輸嘅星矢、比賽得返半秒都唔放棄嘅瀨那、球証未吹雞比賽都未完結嘅戴志偉、定係冇超能力嘅英雄《我的英雄學院》，甚至《一拳超人》入面欠實力但永不放棄嘅無証騎士，講嘅唔係勝利，而係盡力而為、堅持、明知不可為而為之、問心無愧。
.
.
【70年代以前與90後的兒歌教育比較】
回想返70年代之前呢？農業漁業社會背景，當時嘅香港兒歌叫童謠，歌詞多強調群體生活中嘅個人責任、社會穩定、望子成龍。就好似：
.
「螞蟻亦要搵野食，唔做事確係無益，
少壯就要多努力，來日望自食其力。」《學生哥》
「落大雨啊 不浸街 社會安寧哪怕風雨大？」《落大雨》
「一分耕耘自有一分收穫
懶惰去做人 又點會有所成呀？」《雞公仔》
「阿哥佢聽教 阿媽就開心哂咯
阿哥佢唔聽話 阿媽就唔安樂」《雞公仔》
.
踏入80年代美日文化進一步來港，卡通歌詞多為卡通內容嘅形容（例如《高迪安》、《叮噹》、《IQ博士》、《足球小將》）
.
90年代兒歌緊隨流行音樂出現本土創作潮，較多歌頌真善美等價值（例如《夢中天使》、《仙樂飄飄處處聞》、《生命有價》、《打開心窗》）
.
【90後的生命導師】
90年代後，香港開始日本動漫文化（Jump文化）影響嘅高峰。我哋成長嘅參考，一種主角係極度正面樂觀嘅角色；另一種就係悲觀嘅日本人。
喺我哋嘅成長中流傳嘅故事，影響我哋做人嘅唔係李嘉誠穿膠花白手興家嘅故事，而係一次又一次睇住動漫主角面對極端強大嘅敵人，毫無轉機嘅超級逆境，甚至承受住好人被當賊扮嘅激心，點樣喺絕對黑暗嘅絕望中憑住堅持搵到（同等待到）希望。
.
.
冇錯，有時係「等待」。
.
近年大熱嘅《一拳超人》，好多時英雄們一樣要捱到琦玉老師到達。然而，現實中其實似乎唔係咁多超人，甚至近年更流行一啲反英雄主義嘅文本。
.
我啲學生好鍾意玩一隻PS4叫《地球防衛軍》嘅遊戲。學生介紹遊戲：「面對怪物或者外星人襲擊，我哋唔係咩超人，咩英雄，咩機械人，我哋只係負責擊退外星人嘅一個士兵仔，一個嘍囉。」
「吓？咁玩到幾時完呀？」
「你同個團隊打哂啲怪物就完，或者好多時要等劇情發展，有人打救，就會知幾時完，Keep住打，唔好死就ok。」
.
我覺得呢個遊戲真係而家香港人嘅真實寫照，坊間評論分析雖多，其實冇人預計到未來會點發展，但香港人，都要Keep住努力。
當麥兜慨嘆「經已沒有嗰家嘢喇」，香港回不去了，唯有做個地球防衛軍兵仔，同戰友捱下去，唔好死。香港人，加油！
＃其實本身只係想寫個撮要