文：JF@思言財雋
可能有人會擔心，你地班友玩到咁大，專登要喺G20峰會落習大大面，萬一激嬲咗中央，收緊對港政策，香港人咪無啖好食？
講真，2014年79日佔領已經激嬲咗中央，中央亦做咗好多嘢打壓反對派，又DQ又重判九子，樓市股市咪一樣照升？大陸在香港有龐大經濟利益，唔會同自己荷包鬥氣嘅。
反而特區政府無啦啦搞壇逃犯條例修訂，就真係會嚴重打擊香港經濟嘞。外國公司擔心員工人身安全，可能會撤走香港嘅業務。本地商家，尤其是同大陸有生意來往嗰啲，都會轉移部分資產去外國避險。大陸落嚟嗰班有錢佬，唔使問梗係拿拿聲賣樓走人。
最大鑊係如果通過修例，美國佬分分鐘會取消香港關係法和獨立關稅地位，其他西方國家亦可能會有相應制裁行動，到時香港就會失去優勢，變得同其他大陸城市無分別，咁香港樓市同股市肯定無運行。
依家件事搞大咗，全世界都望住香港，北京有所顧忌，反而唔敢亂嚟。香港係彈丸之地，點夠大陸鬥？但如果我地好好利用國際金融中心呢個地位，爭取到國際社會嘅支持和監察，撐住一國兩制，咁樣大家都有飯食。
順帶一提，警察向示威者開槍，又話係暴動，外國遊客唔知頭唔知路，以為香港通街暴徒，仲邊度有人敢嚟？撐警嗰班人，搞到警察以為自己做得好啱，一味企硬，呢啲「暴動」只會沒完沒了，其實害死香港。