2016香港立法會選舉曲終人散，我雖然係澳門人，但睇香港立法會選舉，肉緊過睇澳門立法會選舉多多聲。
拋開個人立場，單從食花生的觀眾角度看，香港立法會選舉，由選前睇拉票、睇民調、睇論壇，睇配票、睇網上評論、睇左報爆料，到選舉日睇票站爭議、睇蛇齋餅粽、睇選情告急，再到等結果時睇候選人表情焦慮、網民緊張、有喜有悲、有高票落選的、有爆冷入圍的、有連任失敗的，總之是百花齊放。
建制與非建制鬥得激烈不在話下，建制與建制、非建制與非建制同路人之間，同樣有爭得你死我活的，也有犧牲小我完成大我的，反正都是好戲連場，每一分鐘都充滿變數。周永勤受威脅被逼棄選，何君堯陰陰咀奸笑；毓民大鬧游蕙禎未夠班，好一句「你諗住踢走我嚟贏？發夢冇咁早」，最後竟真係敗選收場；部份非建制候選人棄選讓路予更有機會當選的同路人頂住建制派，以大局為重值得尊重；長毛戰至最後一刻終於險勝，讓支持者抹一額汗；到壓軸超區鄺俊宇為頂住周浩鼎，結果差啲頂埋涂謹申，過程都是高潮迭起，教人看得咬牙切齒。
反觀澳門的立法會選舉，只是一潭死水，每屆選情相若，未選已知建制派會壟斷議會。以今屆立法會為例，33名議席只有4名非建制議員，議會早已成為橡皮圖章，仲有甚麼睇頭？選舉前民調欠奉，帶動不起氣氛；所謂選舉論壇質素低得可憐，候選人對紙噏下政綱讀下稿又過一關；主流媒體只會保皇，擦鞋維穩不看也罷。是是但但每四年搞場大龍鳳，分完餅仔繼續馬照跑舞照跳。
跟澳門相比，香港的立法會仍起到自身作用，左右紅黃藍為求入局施展渾身解數與旁門左道，使選舉有激情、有火花、有話題。隔岸觀火的我，只好慶幸澳門還有這樣的鄰居。香港人請加油！明日不要變成今天的澳門。