文：Natalie Hui @ Be a Smart Voter
政客係選舉前，為求得到選票，攞到議席，都會黃大仙上身，有求必應乜都肯制。但上任後，又會忘記昨日的我，將選舉承諾拋諸腦後。呢種情況造成選舉政綱往往被看為空頭支票，更甚係令到投票嘅選民有被呃嘅感覺，呢兩種結果都會削弱從政者同公民社會之間互信嘅基礎，造成政策落實嘅障礙。
唔想咁樣，又有咩計呢？
美國就有一班記者，由佛羅里達州當年名為聖彼得堡時報（St. Petersburg Times）* 華盛頓辦事處主管 Bill Adair 領軍， 成立咗一個名為「政治實情」PolitiFact 嘅網站（www.PolitiFact.com）去追蹤不同政客喺競選時期所許下嘅承諾落實情況。其後 PolitiFact 亦發展成為美國歷史上最大型嘅事實查證」（fact checking）力量， 得到咗廣泛傳媒嘅注意，當中包括不同報紙以及電視網絡，例如CNN，甚至獲得美國普立茲國內報導獎（Pulitzer Prize for National Reporting）。咁樣嘅公眾監察，令到政客更困難或者要花上更大政治成本先可以走到選民數。
過去八年喺美國最重要政治人物就係奧巴馬，所以佢係美國社會監察嘅頭號對象，PolitiFact 因此設立 Obameter（奧巴馬計）去提供奧巴馬達成競選承諾最新鮮熱辣嘅成績表。Obameter 逐項列出奧巴馬所有選舉承諾，並將之分成三大類：未有行動、進行中、及停滯不前。當奧巴馬啟動某一議題，個議題就會被評為遵守承諾、妥協、或者違反承諾。
PolitiFact 亦明白掛一漏萬，未必可能包括晒所有奧巴馬嘅競選承諾，所以佢哋亦會叫讀者提醒佢哋有咩遺漏，令到佢哋資料庫可以更完備，能更全面監察奧巴馬政府。Obameter成為另一個對奧巴馬及白宮政府嘅提醒，佢哋需要好好咁遵守承諾，因為媒體及公眾將會以佢地嘅行動而非佢地嘅言論去判斷佢地嘅誠信及政績。
PolitiFact 嘅行政總裁 Aaron Sharockman 總結八年以來 Obameter 嘅經驗，特別指出競選承諾並非每個都同等份量，以奧巴馬為例，足足有超過500個大大小小嘅競選承諾，若果所有呢啲承諾都放入 Obameter 被監察，對公眾用戶來講將會係相當花時間。所以佢哋將監察範圍集中係100 至 200 個承諾，更主打跟進被選為最重要嘅五個承諾。呢個五強跟進名單，係根據不斷嘅用戶訪問同埋網站瀏覽數據分析而定。而用戶亦可以自選個別所關心嘅選舉承諾去跟進，一旦嗰啲選舉承諾有任何更新，用戶便會收到電郵通知以便獲得最新消息。Sharockman 希望呢個監察工具能夠成為總統在任活生生嘅紀錄，而非每年一次嘅滙報及回顧。
Obameter 開創先河，並且相當成功地以低成本、公開透明、公眾又能夠參與嘅方法去監督總統及政府，所以好多其他國家相繼仿效，如澳洲的 ABC’s Promise Tracker 、埃及的 Morsi Meter 、伊朗的 Rouhani Meter 。
睇完美國嘅 Obameter，加上過去五年香港人俾梁振英走咗咁多競選承諾數，面對就快被選出嘅新特首同埋佢所籌組嘅新政府，香港公民社會又可唔可以嚟翻個 「林鄭月娥選舉承諾同你計」、「曾俊華選舉承諾同你計」、或 「胡國興選舉承諾同你計」呢？
註：以上是筆者個人意見，不代表「做個聰明選民」立場。
*St. Petersburg Times 於 2011年改名為 Tampa Bay Times
延伸閱讀：
PolitiFact’s Obameter
“PolitiFact is getting ready to rate the promises of the new president” By Alexios Mantzarlis
“Obameter” Keeps Track of President’s Campaign Promises” By Harut Sassounian