最近澳門又為左條「新土地法」嘈嘈嘈。其實澳門人同香港人一拎樣，睇人仆街就最開心，所以見到海一居班炒家同商家佬，因為呢條法律搞到焦頭爛額損手離場，大家梗係拍爛晒手掌。但如果大家真係以為天降良法打救世人，就真係少年你太年輕了，完全忽視咗整件事背後嘅利益關係政治角力，甚至涉及今年立法會選舉，同埋2019 年特首選舉。
被譽為地少賭場多嘅澳門，一直係各利益派別爭權奪利嘅場所。喺澳門縱橫多年以何氏家族為首嘅舊發展商聯盟，有咁耐風流就終於要折墜：2013年天降一條「新土地法」，一次過郁晒佢地囤積多年嘅地，而家梗係呼天叫地叫苦連天。
有啲發展商要生要死，話發展唔到唔關佢地事，話係社會係政府嘅錯，「點解要充公我地」云云。即使知道責任未必在呢班發展商身上，例如有份官方報告話有成65幅發展唔到但「不能歸責」發展商嘅土地，但政府同部份議員繼續充耳不聞，對發展商修法訴求無動於衷。點解？喂啊哥，眼前係個勢力大洗牌大好機會喎，俾著我都食住花生睇好戲啦。
試想像下喺「新土地法」底下，啲地被充公之後就要公開招標，60幾幅值成2000幾億澳元既土地就咁重新分配，對於咁多年都拎唔到著數嘅邊緣商家佬嚟講，今舖簡直係「飛雲機會來了」，仲唔一口氣大手入貨，挑戰舊嘅果堆發展商聯盟喺澳門嘅控制權？一場房地產市場嘅腥風血雨，一場既得利益者寶座既明爭暗鬥，好快就開始喇！
議員唔出聲，除咗係因為勢力大洗牌，仲有就係－選舉近了！因「新土地法」而中咗大伏嘅海一居，夾埋有成三千戶，粗略估計有成萬個選民。喺現行嘅選舉制度下，上萬個苦主們夾夾埋埋，分分鐘換到一席。
咁就唔關得之工聯關翠杏同佢啲黨羽咁鬼落力，希望政府特事特辦淨係「關照」海一居苦主。大佬，成萬飛，乜嘢公義、乜嘢「新土地法」有重大漏洞、乜嘢有機會殺錯良民，who cares？最緊要係剩低日子零動作零失誤，議席安全上疊，vote is king！苦主們快啲多謝關姐，關姐好嘢啦。
企硬唔修例嘅立法會主席賀一誠老老實實忠忠直直？佢同香港就快收皮嘅「689，好特首」梁振英一樣，都話過自己唔會選特首。但政客講嘢你信一成，雙目都會失明。誠哥舞劍，意在特首，「新土地法」幫到自己友搶地上位之餘，又幫自己儲到大量政治同土地資本，2019年特首選舉一登大位就可以大展拳腳，建立賀氏王國，諗起真係「和味過和味龍」啊，咁大舊肥豬肉喺面前仲點會同你講修例先？
澳門朋友，真係覺得「新土地法」唔關你事？真係要小心睇路啊。