香港海灘受到某強國嘅垃圾所入侵，引發一連串嘅討論。
其實地球就圓嘅，可能啲垃圾未必係某國家流入黎呢？可能囉～～（曲）
但班高官走去打鑼打鼓話去執垃圾，我唔該你地咪咁柒啦！
《罪名一：矯柔造作》
盲嘅都知道，呢場只係一個表演，但表演係有分「成功」與「失敗」
呢個絕對係一場失敗之作。
由偉大嘅梁同志帶領一眾高官去執垃圾，期間幾十人包圍住佢地，全程有講有笑，毫不帶點失望之情。
如果淨係影個頭，我會極度懷疑佢去左BBQ，燒緊龍蝦食。
引用某國總統嘅行為：總統落到大排檔飲啤酒，隔離肯定有幾十個保安預備緊，但人地影出黎個效果，係咪好過你烚熟狗頭咁先？
《罪名二：連累街坊》
有小道消息指出在「表演」前，大量清潔工受命提早到場清理，將大量重型或相對「核突」嘅垃圾清走，然後將膠樽，膠袋等「見得人」嘅垃圾留係到。
屬真屬假，可以推測，而推測，需要合理。
1）如果場內有堆重型及極度核突嘅垃圾，高官係記者同一眾市民面前，如何是好？清又有失尊貴，唔清又尷尷尬尬。
2）我亦都係開頭講咗，呢個只係一個場「表演」，而「表演」係需要有道具，「劇組」人員呢個安排，絕對合理。
而呢場戲，就要班清潔人員添加工作量，幫你地做埋「場記」。
《罪名三：自打嘴巴》
香港政府嘅方向，一向都以搵錢為上，其餘「阻住搵食」嘅嘢全部都要彈開。
單睇近年嘅基建就知道。
死幾十條白海豚姐～放心，我會起返個墓比你地。
如此態度嘅人走去話環保，情況有如一個著哂皮草嘅人，搞個全肉食嘅晚宴，主題就係：「愛護動物」
絕對令人作嘔。
【後記】
一場表演成唔成功就係睇效果，呢類型表演絕對係會留黎反效果。
我係到提醒一下，如果你地真係要做表演，唔該專業多少少！
個人專頁：吹水皇的後花園
痞客邦 : 吹水皇
Google Blog : 吹水皇的後花園