口說愛香港，但何曾改變過？
Celia：唔好再標籤我地係環保撚。我唔係介意個撚字。。。
＊＊＊
今年香港再無冬季，迎來的是漫長秋天，每一天都是上山的好時節。
媒體吹捧「隱世」秘景，卻換來山友聞之痛惜。山野非由誰所私有，問題是民眾的公德，跟不上他們的足跡。
＊＊＊
問：點解會關心環保議題？
Celia：絕對冇人天生就有環保基因。但有小小背景，我係屋邨妹，爹哋係一個好慳嘅人，咩嘢都要用到盡，應用先用。
係過去嘅日子，我都係個普通人，即係一個浪費鬼。當年成績差到嘔，純粹因為符碌，入浸大讀環境科學。
所以吳克儉話咩生涯規劃，但生涯其實冇得規劃，你永遠唔知嚟緊發生咩事。經過際遇同磨鍊，你先會知自己想走邊條路。
有一次上堂嘅時候，教授不斷講垃圾嘅影響幾大，但一完堂，佢就將手上水樽隨手扔落垃圾桶。我印象好深刻，講嘅時候就頭頭是道，講完就一啲都唔在乎？
＊＊＊
問：點解會成立神期食品？
Celia：其實「結束一桶專棄」同「神期食品」，都係我、日青、劉單尼等幾個朋友搞出嚟。
畢業後我加入過朱漢強的地球之友，推動過廚餘和捐贈食物。但好多公司都留到過期前最後一日，先將食物捐出嚟，受贈者會覺得過期食物唔係咁好。
當時社會仲未咁 open minded，但外國超市已經正式出售過期食物。我地同浸大做 Lab Tests，發現八十幾種過期食品，細菌都冇超標。所以一班「結束一桶專棄」的朋友，一齊再搞「神期食品」，叫大家唔好拋棄過期食物。
＊＊＊
問：究竟你遇到帳篷時，上緊山抑或落緊山？
Celia：其實係上緊山，行到一半。搬返山腳先有分類回收桶，破壞哂我所有心情。
我好唔理解依件事。好多人都話好愛香港，講好多本土議題，但大家有冇珍惜過？點解你做咁多嘢其實破壞緊個地方？
例如一個為弱勢社群爭取權益的人，食完煙就扔煙頭落地下，當時朋友呆左。之後邊個幫你執？咪就係清潔工，咪就係弱勢社群！
又例如係旺角佔領區，我地唔希望繼續浪費水樽，想自設水機，自己斟水。有啲政黨係立法會就質問政府，環保政策做得唔好；但當我拎水機俾佢地，冇水去附近花園街運動場補充，佢地就耍手擰頭，話人手唔夠。
我係山上諗番依啲事，心情跌到谷底，變到好似癲婆咁。話愛依個地方，話去郊野接觸大自然，其實都好假好虛偽。
＊＊＊
問：二東山、鳳凰山、東龍洲。。。各地相繼淪陷，你怎樣看？
Celia：一撚樣，唉。。。
就好似我地搞唔再玩螢光棒，今年仲有朱凱廸幫手，但網上世界同現實世界係兩件事。所有悲劇永遠繼續重演。所以係 100 毛嘅訪問唔小心喊左出嚟。我真係已經做到崩潰，點解講極都唔醒。
唔該你一定要幫我寫出嚟，我真係好憎好憎大家標籤我地做環保撚，我唔係介意個撚字。
大家標籤我地做「環保人士／環保撚」，覺得依啲事只有我地先會做，佢地唔駛做。
唔好再講「靠哂你」，真的難聽過粗口。唔好將責任放係其他人身上，可唔可以自己呼籲身邊嘅人，自己做多少少嘢？
我一個人執唔哂一百個人一千個人一萬個人嘅垃圾。
＊＊＊
後記
約自初中起，筆者會將垃圾的塑膠拆下，留在口袋，行經回收桶才放下。從小不敢揚聲，因為身邊連放膠樽到回放桶的人都沒有。好多年後，看到日本電視節目，原來有其他人這樣做，才放下心頭大石。
晚近又有男生因打包而遭嫌棄。究竟怎樣的社會，孕育出怎樣一代人，背後同是世代之爭。人到三十歲，意識形態就定型，再難改變，只能鬥長命。很多人包括自己，都不時對揼石仔心灰意冷。
除了鬥長命，還必須檢視傳統，轉化成今日資源。例如愈來愈多人重新發現佛教。另一方面不妨從自己開始，敢於履行自己態度，其實很多人連這點都未做到。