華航機師工會啱啱同腦細達成協議，呢個星期以嚟，見住佢哋團結罷工，真係令人滾動。
機師工會為咗改善疲勞航班同埋自身權益而發起罷工，呢場罷工本身就係一場重要嘅公眾教育。
機師令我哋明白喺飛機上面，員工嘅待遇同乘客嘅安全息息相關。而機師工會都話俾大家知員工只要團結，不可一世嘅腦細最終都會坐低同你傾。
台灣除咗基本嘅議會民主之外，其實佢哋嘅集體談判權機制，都好值得同香港比照。喺台灣，若果公司有二分之一僱員參加職業工會，工會就可以提出集體談判（在台灣稱為團體交涉權）。
以今次罷工為例，華航有超過一半機師加入咗機師工會，工會就可以依照法律，要逼公司坐低談判。當然，華航一開始唔肯協商，先逼到班機師要投票決定罷工。
反觀香港制度，1996立法局曾經一度通過由李卓人提出嘅集體談判權法案，但喺主權移交之際，被臨立會粗暴廢除。此後香港嘅勞資爭議，腦細睬你都傻，若果唔係工人組織罷工，根本唔會同工會談判。
一個健全嘅民主社會制度，除咗民選議會同政府，仲應該有屬於打工仔女嘅集體談判權利，平衡勞資不對等嘅權力關係。