一直密切留意華航飛機師罷工情況，睇住管理層嘅抹黑真係越睇越心寒，好彩都仲有唔少乘客體諒同理解平衡返！
飛機師一話要罷工⋯⋯最容易俾人攻擊嘅論述係，佢哋人工高、社會地位高，好心就唔好咁貪啦！講呢啲說話嘅不乏嗰啲乜乜乜總經理、乜乜乜主管⋯⋯次次睇完，都忍唔住笑啦！你班高層過去一年有幾多日唔夠瞓？你又有冇試過過勞呀？
唔知大家係咪睇得太多衝上雲霄，對呢個行業太多美好想像！查實每程機都面對住大量數目字資訊，仲有地面無間斷嘅、每一個航點都有嘅無線電通話，仲要mon住天氣變化再調整點應對⋯⋯仲有仲有，求上帝保佑本身行機裏面唔好有啲咩古靈精怪嘢發生， 真係一眼關七都形容唔哂佢哋駕駛室入面嘅工作！
查實華航飛機師嘅六項工會訴求已經積壓咗好耐！搞到罷工亦即係談判破裂，其實僱主負上最大嘅責任，一直毫無誠意解決困難，用返台灣朋友用嘅字眼「跳票」，即係次次都講過唔算數。
見住華航不停地拿乘客做籌碼，道德勒索班機師，但唔諗下罷工背後嘅原因，一昧打壓，真係好可恥！
有客人受影響，我都明白會有唔開心同失望，不過希望做打工仔嘅可以將心比己，無人想俾老細蝦到上心口，每個機師都想平平安安做嘢～～～我成日提醒朋友，當大家每一次坐飛機享受你愉快旅程嘅時候，唔好忘記背後成就這一班航機嘅每一位工作人員到底付出咗幾多！