工程部工友介紹系列簡介︰
在2013年1月至2月期間，嶺南大學工程部工友發生被資方拖欠花紅事件。因為這次事件亦同時揭發了工友在薪酬上遠比市場低、醫療沒有保障、人手不足等問題。工程部工友介紹系列正正是為了支援工友的爭取，從而讓嶺南教職員以及學生能夠認識嶺南大學工程部工友而生的計劃。希望從計劃中可以讓更多人知道工友的工作環境以及為嶺南大學所作出的貢獻，從而提高關注工友以及勞動階層的意識。
工程部工友介紹系列
自1999年至2013年的嶺南人 – 張師傅
職位：有電牌、冷氣牌的技術員
在1999年的8月，一名姓張的男子看見報紙上登了一份招聘技術員的廣告，就去了鰂魚涌見工。最後，可能姓張的這名男子當時家住屯門，因此，就被派到來嶺南大學，開始踏上13年又6個月的嶺南人之路。
之前曾在有線、美心、維他奶等公司工作的張師傅形容當時一聽到是來一間大學做，「之前未試過，都有D High High 地。」他第一日到嶺南，就是跟當時的師傅去了HALL F，而權叔及志偉早在張師傅來到之前已經在嶺南工作。「果時係係房入面整書枱。」什麼樓層，什麼房號，張師傅已經不記得。當我問起張師傅十多年來有什麼事件是最難忘，張師傅答了一個名：「坤仔！」原來，被工友稱為坤仔的前嶺南大學校長陳坤耀當年因一盞燈短路而起火，燒著了窗簾，有「火屎」落了坤仔白色的地毯上。「當時我住係屯門，係最近果個，收到ORDER就立即趕返黎。返到黎果時，火已經熄左。而我就要去拎D 電風扇入去吹走D味。」(與此同時，張師傅隨即向我講解平日政府廣告中呼籲市民要關掉所有電器的重要性！總而言之，就是電器在待機狀態都會有短路危險之類…)一聽見張師傅提起坤仔，我當然打蛇隨棍上，問一問當年坤仔的人品等八卦問題！「坤仔，佢好客氣，平時好遠見到，佢都會點點頭同你打聲招呼。果時逢星期三佢都會係上面二樓同同學食早餐，所以我地返工果陣都會係LG見到佢。」
而當日於工友、學生會、校方和資方的公開會議中，代表校方的廖小姐當然也是張師傅的服務對象之一。「佢辦公室果張地毯係我地幫手鋪。」同學見張師傅一提廖小姐，追問一句做了十三年有多，現在對嶺南及置邦公司感覺如何？張師傅笑笑口答：「俾人搵笨，上左條賊船。」原來兩年前，張師傅是有機會離開的，最後因為工作地點因素而留在嶺南。十三年來，張師傅為嶺南貢獻無數，張師傅提起兩年前的暑假，嶺南每年暑期都會將宿舍租出給一些宗教團體，搵搵外快。
「有一晚凌晨，突然收到個電話，話有棟HALL停左電。話果時天氣又熱，冷氣又壊左，熱死入面D人。我返到黎，同保安講，去逐間房拍門，叫佢地熄晒D冷氣，我再搵原因。果到搞左個幾鐘，之後又要再去逐間房拍門，叫佢地慢慢開返晒D冷氣。好彩果時搵到撞個點，如果唔係，我係下面機房，一開制，就會爆，係成個人炸出門口果隻。」
可是，當晚工程部只有張師傅一個回到嶺南幫手，沒有一個管理層的人員回來。「俾人鬧果個係我，同人解釋果個又係我，整果個又係我。」
回憶起此事，張師傅也接上一句，「都唔明點解唔珍惜我地。」
眼見氣氛有點低落，我也問一些關於嶺南同學的問題。「當然，都會有D麻煩既同學，例如叫我地整電器，但我地唔係依方面既電子野。都有D好既同學，有幾次做完個ORDER都有D同學會俾野我飲。」
最後問張師傅關於今次事件，張師傅答：「好遺憾，我地又唔係奢望高，只係要一個合理就OK，今次依件事係佢地迫出黎。」