為左了解工友們嘅日常，探訪隊決定第一次行動要先行下個區，搵下有啲咩係我哋平時「看見，看不見」嘅。
人多膽就大，探訪隊一於試下在置樂掀開多個垃圾桶，睇下入面有咩垃圾，包括下圖呢個。你冇眼花，呢個係煙頭桶，入面確實有個喇叭。隊員圍住個喇叭研究咗一陣，留意到有以下特徵：
- 估計設計上應該係想煙友由桶蓋上的窿仔放入煙頭，再由個喇叭接住
- 兩個觀察嘅煙頭桶內，個喇叭嘅高度都唔同，而且與桶面有條大間隙，唔少煙頭都接唔住，跌左落桶底
- 桶底就裝置咗一件重物(疑似石屎/金屬)，工友難以搬動個桶去清掉落既煙頭
除咗呢種煙頭桶外，喺一般垃圾桶上有煙灰缸，煙頭經常未熄，我地當日亦留意到有人刻意倒左一啲水落呢啲缸度，以免燃燒。
工友們係點處理呢啲燒著咗既煙頭呢？倒左水對工友嚟講係咪好事？既然有煙頭桶，點解仲要喺桶面加煙灰缸？煙頭桶設計係咪合適？數量又夠唔夠呢？
2016年，環境局成立了「桶改會」（公共空間回收及垃圾收集設施改造督導委員會），睇下全港的4萬多個垃圾桶設計、分佈和數量，點樣做到減費和回收。工友在清潔前線，有無份參與桶改會？垃圾桶和回收箱又同社區特色有無關係？
對於工友嘅工作日常，同埋我哋社區嘅廢物處理方法，如果你有咩想知，想問工友，可以留個言，等我地31/3 探訪時繼續了解。當然，更歡迎大家加入成為戰友啦。