好想知道，咁多位環保人士去遊行既時候，每次經過垃圾桶見到個堆垃圾同回收物既混合體，會唔會有種「來回地獄又折返人間再打入地獄」x1000000 次既感覺，筆者就係被呢個「破地獄」既感覺折磨左太多次，即使你可以控制到自己唔製造垃圾，但望住其他人一支支樽裝水係咁買係咁掉，遊行標語用完即棄，見到垃圾桶爆哂都狂塞狂掉…. 一路行一路係度諗: 行得出黎既都應該係想為香港好，但大家好似只係打著愛香港既旗號，而又下意識唔生性地做出破壞香港既濕尻行為，咁究竟我應唔應該怪大家好? 天人交戰到個人開始精神失常，完全遏止唔到自己既嬲怒情緒，繼而抑鬱到連行都唔想行出黎。
不過係大事大非之前，唔行出黎真係會愧對自己作為香港人既身份 。所以，為左令自己好過D，筆者帶定左兩個膠袋係維園起步出發做回收，諗住「遊擊式」地搜羅條街垃圾桶回收物，執得幾多得幾多，亦預左沿途既垃圾桶光境必定令我抑鬱發作，不過，尋日遇到好人好事所帶黎既曙光令我個「遊行垃圾創傷後遺症」有少少改善，包括：
1. 有市民不忍見我工具太簡陋而主動送上垃圾夾一枝及大量膠袋，手套亦有人提供但為免製造太多即棄用品本人只能善意謝絕
2. 執垃圾既團隊由一人無啦啦expand到二三四五六人，大部份似乎係學生哥（同佢地企埋一齊好似我都岩岩考完DSE咁），有d仲要執得搏命過我，心諗「後繼有人，老懷安慰」
3. 需知道我地一路行一路執，淨係係銅鑼灣執到既回收物已經超出我地幾個人雙手既負荷，仲點執到去灣仔同金鐘？感動既moment出現啦，我地開始向沿路行去政總既市民求助，叫佢地幫手將回收物帶去添馬市民自設既回收站直送到去回收商，呢個request對於厚面皮如我都好難開口，一黎袋野真係有d污糟，二黎羅咁長時間真係好L攰，但係好多朋友仔二話不說成袋幫手搬走，用螞蟻搬家既方式幫手將d野運哂去終點，呢個嶄新既回收物運輸方式真係令我覺得好amazing，本人真心感激流涕。
好，打完飛機讚美完遊行人士， 我地都要符合返呢個page以潑婦罵街為定位既風格，揭露當中既火滾位 （如大家只係想繼續塑造遊行人士有幾咁高質，大家可以成段skip左佢廢事俾人鬧我地分化）：
1. 係其中一個商場外執緊個幾個滿左既660公升垃圾桶時，有個清潔工走過黎問我做乜野，我同佢講返聲唔好意思我地攪到咁多垃圾我諗住幫手清返d回收物走減輕佢工作負擔，佢即刻食左炸藥咁連珠爆發：「你地掉咁多垃圾我都算，竟然有人係商場門外噴油「林鄭收皮」！句野完全都唔關事！你知唔知我要逐個逐個用天拿水幫你地捽走幾咁辛苦！本身你地遊行我都支持，但係你地咁樣攪到我真係由支持都要變反對呀！」就係咁，我用左10分鐘時間安撫佢，同佢講噴個d人真係仆街我會勸喻大家唔好為清潔工添煩添亂，本身我仲話幫佢出張噴油張相指責d仆街，但佢地反而幫示威者諗，擔心商場會追究，睇返cctv令到佢地被人告攪大左件事，所以都係算數，聽完佢既苦況都仲咁擔心示威者，我企係個度真係覺得好無地自容。我地係活動裡面話要爭取公義，但係我地係中間既過程同手段確實係侵犯左佢地既利益，不論係清潔噴畫，定係製造左大量既垃圾要佢地幫手執手尾，當我地變成加害者損害左社會上另一撮人既公義，我地爭取到返黎既公義又算得上係乜野？記得，係呢場運動裡面我地係要拉更多支持者，而唔係作出一d白痴行為令我地既支持者掉轉槍頭反對我地呀呀呀呀！
2. 其實街頭好多垃圾桶已經滿左，但大家都會繼續左塞右塞放係垃圾桶上面下面，你地覺得咁樣就唔算係亂掉垃圾？清潔工咪又係要逐件幫大家執清掃走，仲有，明明有d朋友仔都已經係上面寫住政總有得回收，大家係唔清楚咩係回收物，定係真係唔識字，定係因為唔行去政總所以中途掉哂d野定點？你掉都搵個唔滿既垃圾桶掉啦拜託，keep住d回收物同垃圾多一陣真係咁難為你？
3. 有d市民好好心咁係街頭附近放左d未用既清水物資寫左個牌叫大家隨便用，但係唔用眼睇野既仆街又會將自己既垃圾隨手掉落去，其他人見到又跟住掉，跟住我地就會係發現左好幾支未飲既水匿藏係堆垃圾下面不見天日，唔係我地咁摷法市民用真金白銀買既物資又會直接送左去堆填區byebye
4. 個堆未飲過飲左一半飲淨少少既罐裝支裝玻璃裝飲品，以及真係好撚污糟既珍珠奶茶類我真係提都唔想提 （btw下次遊行大家可唔可以真係飲哂支野同避飲玻璃飲品？佢地真係好重同難處理）
5. 白花，呢樣真係嬲到我嘖火。既然你都帶左支白花黎獻俾義士，點解係銅鑼灣已經掉走左佢係垃圾桶！？見到個下我下意識喝住掉個個人但佢愈叫愈走，仲要唔只一次係其他垃圾桶見到白花個下我真係…..errr... sorry I can’t find the right word. 好，唔緊要，你唔獻，我幫你獻，我唔想呢支花死得咁不明不白。
講出黎唔係想譴責大家，需知呢二百萬（加一）既人肯行出黎已經係值得拍爛手掌支持，成件事感動到連雞皮都起到甩出黎。我地知道有好多人係第一次參與遊行活動，但我地希望呢次唔係唯一一次，如果大家將來都會繼續出黎守護香港，我覺得大家有責任知道點樣可以做得更好。 一個健康既公民社會理應不斷進步，而唔係見到好似有成績大家就打回原形，亦唔想大家係爭取公義同公民權利既時候忽略左自己應該履行既社會責任。 筆者都係學習過程當中，有望大家一齊做個真係令大家驕傲既香港人。
查實，有邊個真係享受幫大家執垃圾同回收物架？我相信大部份人落力咁做並唔係想羅光環，只不過大家抱住唔想煩到清潔工既同理心，以及真心愛香港呢個地方先走出黎做呢樣咁嫌惡既工作，而呢份工作唔應該只係落係某d人身上。如果大家都可以做好自己既部份，或者幫手分擔，患上「遊行垃圾創傷後遺症」既病人應該可以好快返，到時就可以毫無顧慮同大家參加每一次遊行活動
一口氣講哂d廢話，最後我發覺遊行住黎做下回收，真係可以洗滌一下身心靈，與其齋行無野做，不如順道幫下手，將大家既心頭之恨發洩係d回收物身上，狠狠地摷同踩落去啦！