恐怖直播二
二零零五年四月二十日 晴 恐怖指數 4.5/5
今天是號外的第二天，本來都無咩，雖然仍然知道有人好嬲，但係我無可能知佢哋嬲咩，因為仍然無人揾我，真恐怖！咁我就去fax封抗議信同份號外比各大傳媒，而其它人就去咗HKU同樹仁繼續派。過咗幾個鐘，有個甚麼樹仁代表打嚟，話我哋份號外好有問題，一啲都唔持平、唔客觀，要睇我哋政綱點寫，又希望停止派發一兩日，等佢哋（學聯的人）傾好嘢先咁。我個腦海即時比問號淹沒，停止派發？點解呀？佢就話咁會引起學聯間不理性的爭論。唔係嘛，學代主黎同學話齋，學聯代表質素咁高，甚至可以自己監察自己，唔係會因為小報小小出版而引起「不理性討論」嘛！我哋報導失實？幾十隻耳幾十隻眼聽到睇到，咁到失實，即係話集體有幻聽幻覺，我都只好再講多次，真恐怖！
之後有星島打嚟，我仲諗住會講下封抗議信，點知個記者話，好多間院校都會採取法律行動，告我哋誹謗，問我點睇。除咗話佢哋想轉移視線之外，我仲可以點睇？不過諗落到幾恐佈，原來有啲人無得還拖，就會狗急跳牆，揾法律嚇人。無ｏ既，咁佢哋係無計嘛，佢哋咁做邊個會怪佢哋？怕的是，我被嚇得面無人色，遲啲出去見傳媒嚇親人點好？原來恐怖都可以交叉感染的。