套《一路向西》睇左都幾百萬世，要磨到而家去完蘇州返黎，先得閒搞埋呢壇蘇州shit，該煨！
第一呢，估唔倒套戲咁忠於原著，原著叫《東莞的森林》，係一位叫「向西村上春樹」響「高登討論區」連載既鴻文，或精確D講，係呢位仁兄響東莞向西村一夜宵魂（叫雞）之後既「賽後報告」。
要講「向西村上春樹」既《東莞的森林》，當然亦都唔可以唔提「村上春樹」既《挪威的森林》，雖然好多村上迷會覺得咁講好唔「啦奸」，人地話晒都係諾貝爾獎大熱喎，雖然今屆又好可惜咁比《豐乳肥臀》既莫言搞掂左。
當然《東莞的森林》單簿好多，兩三萬字梗係比唔上二三十萬字咁豐富啦，而且講「場面」，《挪威的森林》贏足幾條街，花式多多唔在講，打野戰Lesbian蕾絲邊Swing交換插班生樣樣齊；《東莞的森林》除左叫雞一幕之外，就只有回憶同初戀情人搞野既幾百字，十分之惜字如金，當然都好過電影版《挪威的森林》咁惜肉如金。小說《東莞的森林》算係賣得唔錯，聽講都有三五萬，當然同剩係響日本本土，已經都賣左超過一千萬本既《挪威的森林》黎比既話，係蚊脾都牛脾啦！都難怪既，試問血汗工廠既東莞，又點同人類發展指數Number one既挪威比呢，正牌春樹話過，佢話曾經有個女仔成晚睇佢本大作，睇完之後凌晨五點飛奔男朋友屋企，撬開窗搞醒佢打令之後即場morning Q，都真係點到你唔服，呢D咪文字既魔力囉！
「要麼摧毀原著去拍一部好片，要麼忠於原著去拍一部爛片。」兩部電影都根據小說改編，咁當然有辣有唔辣，好既係原著好多人已經睇過，宣傳可以慳返一筆，但衰既係難免人比人比死人，文字係虛既，大家可以搓圓襟扁咁無極限幻想，但係影像就算點朦朧美都會破壞想像，不食人間煙火咁靚即係點，不食人間煙火，唔通食你條蕉咩（《東莞的森林》對白）。
《挪威的森林》賣廣告都幾盞鬼，竟然話呢部係「純愛」電影，咁講不如話係「純做愛」怕且仲貼切D。不過電影版呢方面都真係幾令人失望，床上戲三點不露唔在講，最弊係冇晒前戲夾硬黎，攞女主角既初夜黎講好勒，佢本來好鬼Cool既，但二十歲生日同男主角慶祝個陣就突然發神經咁口水多過茶，講到地老天荒咁滯，六隻唱片播完又播，講呀講，講到男主角意興闌柵想鬆人；又講呀講，講到男主角忍唔住卒之哎Cut，點知唔Cut由自可，一Cut之後女主角就哭崩長城，然後男主角安慰佢一輪，之後先成其好事。但電影裡面一吹熄生日蛋糕就埋牙，難怪之後叫得咁淒涼……。
相反《一路向西》情節上唔單止保留左大部份，甚至連男主角既內心獨白都照字搬紙，但因為場口交接問題，有D都難免要割愛，例如話邪骨小姐同男主角冰火五重天之後問佢係咪要上床，男主角獨白：「放於她嘴邊那硬直東西已是鐵一般的答案，To be or not to be, that is not the question。」另外講做小姐既「厭惡性」亦都響電影「飛沙走奶」左。作者本來係咁講既：「我想起連勝文中槍後，連戰說的一番話：『子彈打在兒子身上，但痛在父母心裡』，其實這些小姐更慘情千倍，每天被飛機打中，還要裝作很爽的樣子」。
當然呢層同長度，我意思係書既篇幅有好大關係啦，呢個亦都係改篇難度之一，就係短既古仔要駁長，長既古仔就要縮短。呢方面《一路向西》算係做得唔錯，增加左男主角既成長歷程，令到套戲完整左好多。
《挪威的森林》就難搞D，因為原著既messages實在天包地包，剩係唔包生仔（證明日本仔既避孕做得唔錯，一味做都生唔出，難怪人口負增長），青春啦，失落啦，虛無啦，疏離啦，死亡啦，原著欲仙欲死，但電影拍起上黎就真係唔知點死，台灣既攝影師李屏賓都算係咁，將原著既氣圍都同埋意境表達得幾唔錯，絕對講得上係情景交融。
其實《東莞的森林》都好鬼文藝feel，試諗下邊有麻辣佬會咁得閒叫完一次雞之後寫兩三萬字架？唔通真係正牌春樹話齋，「因為我是那種一旦有甚麼事，不把它寫成文字的話，便無法清楚地理解它的人。」呢D咪之唔係爛鬼文藝小生囉。
兩篇大作其實都有講到靈與慾既掙扎，而且都攞左政治黎做反諷，性同政治究竟邊樣污穢D呢，都真係唔知，但政治（人物）肯定假大空好多，絕對唔似《一路向西》個位36F蒙牛咁好雙乳咁貨真價實。不過由此諗返起套戲裡面男主角撞著既「假波」，呢段野唔係原著（其實係出自佢另一本書），但同尾段男主角個Friend受到囡囡既冷待同埋恥笑一樣，都幾神來之筆，都幾笑死人冇命賠。
《挪威的森林》有兩段係甘既：
「想做官的人百分之九十五都是垃圾。」
「每天清晨的『君之代』則是鬧鐘，他只要一聽見就起床。這樣看來，那冠冕堂皇煞有介事的升旗典禮，倒也不是完全沒有價值。」
《東莞的森林》就有咁既高見：
「『百花齊放』推行一年後，整風運動鼓勵群眾給共產黨和政府提供意見……那個時期稱為『大嗚大放』，這就跟客人不滿時可以彈鐘，同出一轍。群眾就是客人，共產黨等如桑拿。」
「從鴨利洲的老家，花了一百零五分鐘到羅湖，再用四十分鐘到常平mark了條女，跟著甚麼也不做，拍拍屁股走人，對不起，我做不到。價值六百億的高鐵通車後，大大縮短從香港到廣州及東莞一帶的時間，會否方便到更多像我一樣的人去臨崖勒馬呢？如果可以，六百億倒也花得值。」
鬧鐘同埋彈鐘真係互相揮映，又如果唱多幾勻國歌就唔使起高鐵既話，咁又何妨呢！「通菜牛肉，剁爛剁爛，分開兩餐……」
當然政治係呢兩套作品裡面都只屬配菜，相反「性vs愛」先至係一雞兩味既main course。兩位春樹兄對性既描寫都屬於打真軍級數，直腸直肚哀怨纏綿兼而有之，之不過亦都好反（性）高潮，係咁強調搞完野之後絕對空虛既感覺，講得俗D，直頭係上一刻仲口交happy緊，下一刻已經含林都冇味。
《挪威的森林》裡面透過男主角既朋友咁樣講：「到處和陌生女孩睡覺，你當然不會有甚麼收穫，有的只會是疲憊和看不起自己。」
《東莞的森林》男主角一夜纏綿後又係咁既口吻：「那一刻，我莫名其妙地想哭……尋歡過後，像捲入黑洞，空間的一切也被抽走，連自己也不存在。」
《一路向西》片頭火車開過萬種山，一山接一山，兩邊山都好似靚女冇著衫，最後火車捐山窿鑽入擘開大脾既黑森林。山在虛無飄渺間，笨唔係酒池肉林，相反黑蚊蚊冷冰冰空洞洞，叫天不應叫地不聞，只能食自己。性同埋愛係咪註定要割裂既呢，所謂靈慾一致又到底係咪搵笨實，古往今來紅男綠女，相信都冇乜邊敢唔係話唔地除兼木宰羊。呢D又係咪維多利亞（唔係純粹租房）式既自尋煩惱？呢個世界，性係與生俱來既動物本能，咁究竟有雞先抑或有雞蛋先？有性先定有愛先？抑或係根本有性冇愛？《一路向西》裡面講：「溝乜野女呢，不如正正經經叫隻雞算把啦！」齋吹唔Q做又算點先？又點解搞完野後會有絕對空虛無人觸摸似廢墟既感覺？
《挪威的森林》原本係披頭四既《Norwegian Wood》，原意係屋裡面火爐既木頭，不過唔知點解D蘿蔔頭見林不見木，誤譯左做「森林」（Woods）。D人成日話唔應該為左一棵樹放棄成個森林，不過查實呢句野通常都係用黎安慰D比人飛左既男人。絲蘿願托喬木，為愛情托塔都仲得，為女生為仔死，為左愛情刀仔咭大脾，但就真係好少聽到有人會話為左要叫雞搏老命。係唔係話大樹代表安定既愛情，森林就代表迷失既欲望。《挪威的森林》女主角話：「只要一聽到這首歌，我就會覺得很悲傷，也不知為甚麼，總覺得自己是在深山老林裡迷了路，一個人孤伶伶，又冷又黑，沒人來救。」而呢個森林同埋所謂既「靈慾一致」，係咪都好似當年老懵董既八萬五一樣，已經一早「唔存在」，當然唔好唔記得，其實個女主角係性冷感既！
《挪威的森林》一開始係響飛機上面，空姐見到男主角個樣有D唔舒服，之後就有下面一段既對白，而《東莞的森林》結尾亦有一段咁上下既野出現，不過場景就由漢堡機場降落既飛機，變左做東莞開出既和諧號車廂，而Beatles名曲就變左伍佰 & China blue 既K歌。
"I'm fine, thanks," I said with a smile. "Just feeling kind of blue."
"I know what you mean," she said. "It happens to me, too, every once in a while." She stood and gave me a lovely smile. "Well, then, have a nice trip. Auf Wiedersehen."
二零一二年十月廿八日六點半鐘