七笑上韶關 (十三）
「點.....」X餅憨九九咁睇住阿蛇，
成個腦博命向後高速搜畫，
前塵往事好似澳門金沙個輪盤咁，
轉到眼到花，
佢睇到自己前世喺一碟肉絲炒麵、
再前世係舊羅漢齋，
再再前世係隻雞公碗，
佢揸住快車達車過車，
逢路過路，
越LOAD越遠，
回心一諗，
陳冠希點度都係同佢今生有關咋卦！
而家D畫面咁前世，
梗係LOAD得過過籠啦！！
諗到呢度，
佢立刻樹直唒佢D短腳趾，
用頭文字D嘅爭趾法加飄移大U-TURN，
回頭睇番近年嘅畫面，
卒之喺一個幾乎黑到睇唔到野嘅畫面，
見佢自己噝自己張身份証度貼上陳冠希張大頭相，
佢打個冷震，
剎停哂所有LOAD帶嘅動作！
佢終於記得番啦！！！
(待續）
七笑上韶關 (十四）
嗰陣時單新聞搞到咁大，
本本乜周乜周日日登，
網上d神秘樂樂link四圍放，
睇到X餅慾火焚身，
成日靜雞雞瞞住老婆過大海出火，
仲不斷問自己，
點解自己唔係陳冠希，
點解自己咁樣衰，
佢不斷不斷咁問，
就好似一個成九日參話頭嘅老僧咁，
卒之出完火一樣走火入魔，
佢開始將陳冠希當左自己，
日日出門口番工都喺窗口裝搵哂成條街，
睇下有冇狗仔隊伏九佢。
日日仲帶哂黑超同載左兩頂帽至敢出街。
不過佢咁樣做覺得好快樂、
好享受，
佢直情投入哂角色，
仲想買機票過美國避風頭，
不過就被美國領事掟左去青山，
住左一晚至放番佢出嚟，
之後阿搓餅玲就幫佢告左一個月假，
鎖左佢喺屋企，
日日用家傳秘方「人工肥田料補瘋益佢湯」同佢醫，
過左兩星期，
好似好左D,
起碼知道自己係「陳X餅」，
最多改左姓姐，
不過又物極必反，
佢又係網上大事評擊陳冠希，
話佢唔係人，
以平衡佢心入面嗰種又酸又澀嘅肉酸心態，
身份証上面嗰張陳冠希貼紙，
就係嗰段病發時期嘅歷史遺跡，
架喇！！
（待續）
七笑上韶關（十五）
想到呢度，
X餅立即一手撕左身份証上陳冠希張貼紙，
露出下面個本來面目。
「阿sir,
屋企d細佬手多，
有怪莫怪。」，
「細佬而家唔貼軍曹？貼陳冠希？」，
「騎，係囉，人細鬼大，人細鬼大。」，
個阿sir歪埋個咀好鄙視咁冷笑一下，
遞番個身份証俾佢，
X餅個面已經變左個紅番茄，
其實，
如果佢而家冇著衫，
大家就唔止係見到個紅蓄茄，
而係成條紅蕃薯！
因為大庭廣眾，
仲要係成班江湖朋友面前，
俾人睇到佢陰暗嘅一面，
呢種覆天蓋地嘅羞辱，
真係宜得搵個窿捐入去一死了之！！
不過，
佢諗起搓餅玲對佢嘅恩情，
佢就即刻有哂藉口同自己講，
「冇論受左幾多屈辱，
我都要留係世間，
陪愛人一齊走過人間漫長嘅道路。」，
佢自己係心裡面同自己講，
都打左個好大嘅尿震，
不過，
無論點都好，
佢都算有左一個合情合理光宗耀祖嘅，
忍辱偷生嘅藉口，
喇！
(待續)
七笑上韶關（十六）
眾人一過左關，
大家嗱嗱臨返番上車，
坐番自己個位。
架車就向住大陸嗰邊嘅關口出發。
車上個導遊就係個傳聲筒度嗌：
「一陣過大陸海關後就會換車，
各位落車時要拎埋行李，
因為係唔會上番呢架車嘅！！」，
離奇聽完廣播，
覺得好奇怪又好似事有蹊蹺，
於是就問隔籬個後生仔：
「點解過左嗰邊要換車？」，
「因為呢架車唔係掛大陸車牌架嘛。」，
「哦，但係唔係話我地係一家人嚟嘅咩？」，
「即係咁，一家人食飯都應該用公筷架嘛。」，
「又有沙士咩？」，
「........」，
個哥哥仔發覺自己已經撞到野，
於是咪埋眼低喃：
「時運高，
聽唔到見唔到，
喃嘸夠彌陀佛。」，
點知仲叉大鑊，
離奇一聽到呢個朵，
就發哂癩，
一手捉住佢好熱情咁款：
「你識我阿公嘅咩？
係咪自己人？
你邊個堂口架？
我大佬係千手，
你呢？」，
個哥哥仔已經嚇到呆左，
一時唔知作出D乜反應至好，
好彩廣播器就係吆時大聲大氣嗌：
「大家執齊行李落車過關，
祝大家有個愉快嘅旅程，
聖誕快樂！！」
個哥仔就趁離奇聽廣播入哂神，
一馬當先搶頭落車，
連佢個仔同老婆都唔記得等，
可見佢受驚嘅程度，
肯定十分之超標，
如果有吹波仔受驚測試，
佢肯定係「驚大左」，
被人告佢「危險驚駛」都，
有份！！
七笑上韶關（十七）
跟住成車人過左關，
痾埋殊殊，
又搵到架大陸架接力旅遊巴，
一眾人上番哂車，
想話跟番頭先架車嗰個冧把坐，
點知X餅兩公婆發覺呢架接力車上面，
根本就冇頭先架車嘅座號，
「挑！冇位俾人坐，整乜Q呀？」，
X餅D粗口就咇呢巴啦湧哂出嚟！
嚇到個車長立刻衝出司機位，
邀請佢坐喺司機位側近，
佢至肯收聲！！
咁嘅情況，
其他五個人都當唔識得佢，
唔係，
應該係六個，
連搓餅玲都當唔識佢，
擰歪面望出窗口，
費事俾人知呢兜友係佢愛人。
講粗口梗係會眾叛親離！
你估好盞牙！
係車後面，
龍公子見離奇頭先嚇親隔籬個哥仔，
咪好心主動同佢換位，
嗰條茂利即刻開心到見牙唔見眼，
你估真係唔驚架，
嚇一次就夠哂QUOTA啦！！
吓話？
（待續）
七笑上韶關（十八）
而閒閒地就同美腮子坐埋一堆，
兩個因為唔慣早起身，
都去哂同周公搞野，
乜樹都唔知。
師父仔就坐係架車最尾最角落頭嘅位，
閉目入左甚深禪定。
阿龍公子就為左令離奇識多d世界大事，
就好有心機同佢講而家祖國嘅大勢，
離奇似明非明，
似懂非懂，
一時就博命點頭，
一時就睇住窗外傻笑。
「以中國十幾億人口嘅國家，
要起飛唔係想象中咁易，
尤其係喺管治方面，
其實已經做得十分理想，
你諗下如果係第二度，
三聚氰氨一單就算？
以人口比例計，
起碼幾十單啦！！
所以呢d野要公平，
要全面性作出批評，
唔好旭d就將個別事件撐到天咁大！！
好似驚死佢仲唔夠自卑咁，
睇中國呢個大國，
就要有遠大嘅眼光！．．．」，
龍公子越講越激昴，
點知就可能係佢嘅激昂，
離奇突然企起身：
「起來，
不願做奴隸的人們，
蔥菜牛肉，
啄爛！
分開兩餐．．．．」，
眾人見狀，
立刻衝過嚟用哥羅芳嘅手巾仔將佢焗低，
「都見你地睇住佢，
唔好剌激佢，
龍公子你又係，
同佢講咁多野做乜？」
美腮子瞪一眼龍公子，
個咀依然冇郁到。
師父仔此時拈花微笑:
「一自遁寒山，
養命餐山果。
生平何所憂，
此世隨緣過。
各位施主，
你地當中睇怕最幸福都係離奇大佬喇。」，
各人回頭，
見離奇大佬陰陰咀瞓到流哂口水，
乜事都唔知。
(待續)