七笑上韶關（十九）
旅遊巴繼續前進，
七個卒之瞓低五件，
淨係得X餅同搓餅玲坐係車頭，
俾司機大佬嗰手出神入化的飄移技術激活左全身細胞，
金精火眼撑大個口睇住佢表演。
逢車過車逢馬過馬，
X餅心諗，
咁有鬥心，
搵佢落香港做騎師就發喇。
不過佢唔騎馬而騎車，
就真係相當大材小用囉。
想吓想吓，
嗌吓嗌吓，
又過左兩粒幾鐘，
到左放尿的集體活動，
眾人一湧下車，
衝向有兩個公仔標誌嘅入口處。
龍公子一交完水費，
就把握時間，
用佢高超嘅攝魂技術影低周圍嘅靈異活動，
例如一個麻甩佬撩鼻屎、
一個細佬玩雀仔、
一班茂利踎係度食碟頭飯等等。
聽講影低呢D友嘅靈異事件，
可以第日輯成兒童古仔書，
要嚟嚇嗰D好百厭嘅細路，
為兒童故事開發新功能，
幾能偉大呀！！
(待續)
七笑上韶關（二十）
交水費車外活動之後，
大伙兒都鬆番哂，
上番車就有說有笑，
又話呢處嗰處似台南，
個處似台中，
梗係唔怕共匪D無間道係度偷聽，
分分鐘搵莫須有條公安法搞大你個腦嘅！
話哂七笑係香城都係嚮噹噹嘅廢物，
係公眾地方咁招搖，
真係分分鐘賴野都有份。
不過，
可能傻人有傻福呢句至理名言係有D架生嘅，
所以佢地都冇俾人中途請落車，
如是者行行重行行，
好暢快咁就到左一撻好平好平冇乜山嘅地方，
「怪山啊！」，
突然離奇大叫！！
說時遲那時快，
閒閒地已經用佢套迷魂鎖心法鎖死目標，
連開幾火！！
車外嗰平原中間突然突左舊零零丁丁，
一座似山非山的物體，
就俾佢迫到從實招來：
「我地呢度係廣東最北之地，
我地呢D叫南山北相，
好壽比南山架，
女俠及你的好友們，
歡迎你地到韶關，
歡迎歡迎！！
歡迎歡迎！！」，
嘩，
連山都有哂民革做手！
好難頂，
閒閒地即刻收線，
同大家開示：
「我地已經進入左六祖嘅地頭。」，
各人一聽，
立刻周圍昅，
發覺呢度冇乜特別，
而且可以講話相當之平凡，
完全唔似六祖嘅聖地。
師父仔見眾人完全唔掂，
就結一手印，
口中唸唸有詞：
「若菩薩欲得淨土，
當淨其心，
隨其心淨，
則國土淨。
開！！！」，
於是眾人就開左天眼，
眼前景物與頭先真係－－
一模一樣！！
(待續)
七笑上韶關（廿一）
雖然係咁，
不過大家心情都好興奮！
坐係車頭嘅X餅伉儷就保持專業態度，
一邊開心到攬頭攬頸，
當眾互啜，
但係都可以一邊吩咐嗰兜騎師扮嘅師機：
「韶關金源酒店有落！」，
個師機一邊策騎一邊應佢地：
「我地唔經嗰處，
你地係火車站落行過去好銀近姐！」，
X餅有啜左佢老婆兩啖，
脷都未縮番入去，
就叫：
「記得咪飛站呀，
打實你架。」，
個策騎人即時回敬：
「你邊位呀？」，
X餅一聽，
點解句野咁差熟口熟面，
喺邊銀度聽過呢？
奇怪．．．．．．．．
(待續)
七笑上韶關（廿 二）
好彩搓餅玲夠薑：
「你理銀佢係邊位，
總之火車站有落！」，
個策騎人就俾佢大番轉頭，
死死氣繼續努力衝線。
不動嗚王就好配合，
喺後面命令大家著好衫，
拎好行李，
準備落車。
冇幾耐架車就停低係一個火車站嘅廣場外面，
「火車站，
落快D呀！！」，
X餅見佢咁串，
就想兜後尾枕整野佢嘆，
不過就俾搓餅玲點左佢個麻穴，
「初到貴境，
人生路不熟，
咪多生事端！」，
X餅成身軟哂，
眼水都標埋出嚟，
離奇一見到即刻上去執死雞，
埋去質佢兩野，
於是，
佢地嘅恩怨情仇，
就一世大鑊過一世，
師父仔見狀搖頭噗息：
「滅卻心頭火自涼。
兩位何必呢？] ，
不過，
如果真係一兩個佛偈就可化解一場宿世恩怨嘅話，
嗰D就唔係叫恩怨啦。
X餅用怨毒嘅眼神睇住離奇落左車，
個心博命講爛口，
直到六個人都落哂車，
佢仲掛住講爛口！
個策騎人見佢咁小九氣，
又阻九住佢隻馬衝線收工，
於是就一腳伸佢落車，
X餅正一心不亂咁唸人地老母名號，
直情係想十聲送離奇歸西，
根本就冇留意會俾人無LALA伸左腳，
咪成個人飛出車外，
一頭裁落一隻狗啱啱行開嘅地方，
就係咁，
佢就搵到佢喺韶關嘅第一篤金喇！！
(待續)
七笑上韶關（廿三）
搓餅玲見到佢咁，
都唔知好嬲定好笑，
不過跟左佢十幾年都慣哂喇，
有時仲覺得係一種兩口子之間嘅樂趣嚟添。
佢走過去扶番佢起身，
順手解埋佢穴道，
就稱住佢跟大隊行過去火車站嗰面，
天上落緊微微細雨，
眾人急急腳穿過廣場上嘅的士陣，
直闖火車站。
離奇問：
「做乜唔係去酒店，
要去火車站，
咁快就番屋企呢咩？」，
不動嗚王邊行邊個咀唔郁：
「我地先去賣左後日落廣洲D車飛，
嗱，
一陣兵分兩路，
搓餅玲、
師父仔、
同龍公子係度排隊買飛，
其餘嘅人跟住我先去酒店放低行李同CHECK IN,
跟住番嚟喺番呢度會合。」，
師父仔道：
「冇錯，
一陣直接喺度出發去我地第一站，
南華寺！」，
於是佢地就分頭行事，
架喇！
(待續)
七笑上韶關（廿四）
美腮子率領住閒閒地、離奇同X餅過去的士站個邊，
有幾條友離遠睇到佢地，
就上前兜搭，
「去邊呀？」，
「去酒店。」離奇真係有問必答。
美腮子一手扯住佢件衫，
拖佢走向的士店。
「你咪理D人好唔好？」美腮子邊行邊同離奇講。
「咁好冇禮貌個噃。」，
X餅係後面就搵手推離奇，
「行啦，白癡。」，
離奇俾佢扯到一扑一碌，
鬼殺咁嘈。
搞到美腮子十分之火滾，
一到的士站，
就劑左兩條友入的士行李箱，
反而將所有嘅行李放係後坐，
的士向住金源酒店進發。
原來酒店只係喺過幾條街，
車通過一個古代牌樓的建築，
上面有「風采樓」三個大字，
四周店舖林立，
一睇就知係市中心樣，
然後轉個彎，
就到左金源酒店，
一間五六層樓高普通酒店，
進入大堂尚算見得吓人，
一張大梳化放在入門處，
X餅一見到張梳化，
就一個飛身撲埋去。
「你整乜呀？
坐左成四個幾鐘頭車仲未坐夠呀？
去CHECK IN啦，
係你上網訂房架嘛，
唔使做牙？」，
美腮子一輪咀啄住X餅。
「想休息吓姐，
使唔使呀？」，
X餅死死氣行埋櫃面，
突然佢眼前一亮，
成個醒番神哂！！
(待續）