由於近日傳媒廣泛報導本會喺本月十七號（星期三）嘅佔領語文中心行動，當中涉及唔少誤解，特此作出五點澄清：
（一） 根據檢討大學語言政策專責小組嘅決定，普通話豁免試原意為測試同學嘅普通話基本溝通能力，但最後唔少同學儘管被考官評價表達流暢，亦因各種離奇原因而唔合格，如「語氣不符角色設定」；
（二） 本會帶領同學佔領語文中心，並非單純基於普通話豁免試難度高且合格率低，而係基於出題方式同協議不符、評分準則唔透明、欠缺完整上訴機制、遲遲未計劃取消普通話畢業要求等因素；
（三） 錢大康校長嘅群發電郵指出，校方樂於解答同學疑問，本會無法苟同——事實上，語文中心嘅主任喺同學提出要求後超過五個鐘，先肯將評分準則公開，且談判期間多次以「冇其他準則」、「三個部分比重一樣」等錯誤講法，企圖誤導同學對實際評分標準嘅理解；
（四） 就普通話畢業要求，本會以至其他基本會員已經循唔同渠道，向校方表達訴求，包括體制外嘅公開論壇、全民投票、公開信、體制內嘅教務議會等，但以上行動都無法動搖普通話畢業要求，本會因而以佔領語文中心希望得到合理回應；
（五） 本會尊重所有希望修讀普通話課程嘅同學，亦無意要求校方取消所有普通話課程；普通話對浸大同學修讀其他課程無必然幫助，亦唔係唯一可以修讀嘅外語，本會唔認同作為一間立足香港嘅大學，需要將普通話能力列作畢業要求。
希望各位會員清楚明白事件背景。另外，喺談判過後，校方承諾舉辦一次公開會議，就豁免試同普通話畢業要求進行檢討，希望同學參與，詳情如下：
日期：二零一八年一月二十三號（星期二）
時間：下晝一點至四點
地點：善衡校園方樹泉圖書館FSC 501（鏡房）
語言：廣東話，輔以英語及普通話
校方一直以嚟只係話，豁免試會考核同學嘅普通話基本溝通能力，最後竟公然違背當初對同學嘅承諾，是為失信。明知豁免試內容制訂倉猝，評分毫無透明公開可言，仍然推出畀同學去考核，是為失職。本會僅此希望校方負上校方應負嘅責任，正視普通話畢業要求嘅流弊，正面回應同學一直以嚟嘅訴求。
香港浸會大學學生會
二零一八年一月二十一號