《到底係咪咁Like譚玉瑛姐姐呀你地？》
譚玉瑛姐姐比人升左上神台，比TBB調左做顧問，以後會少D係兒童節目出鏡。大家都好激動，話要去電視城抗議遊行，到底大家係咪真係咁like 譚玉瑛姐姐呀？我認真的思考左一陣，發覺我最鐘意的其實唔係譚玉瑛姐姐，我鐘意的其實係那個「舊時」。
我是八十後，我是睇「閃電傳真機」時期的譚玉瑛。那正正是兒童節目輝煌的時候，我勁掛住的不只是譚玉瑛姐姐，勁掛住的係我地那個「舊時」：
-->勁掛住那個TBB 同亞洲亞洲連兒童節目都有競爭的年代，你仲會拎個遙控咁來咁去，又睇TBB的「咕嚕咕嚕魔法陣」同「長腿叔叔」，亦會睇亞洲亞洲的「蠟筆小新」同「義犬報恩」。
-->勁掛住閃電傳真機卡通片時段，星期一、三、五係播女仔節目，好似美少女戰士；星期二、四、六係播男仔節目，好似魔神英雄傳。咁我當然係唔執輸，星期一睇到星期六啦。
(後來我升左上中學，電視台為左唔好比細路追看卡通片，星期一至五，每天都播唔同的卡通片，咁d 死靚仔就唔可以一三五二四六的追睇卡通片了。)
-->勁掛住那個唔洗補習，上午校同學會恥笑下午校同學要睇「隔夜」卡通片，同屋邨小朋友sss 熱烈討論卡通片討論到鬧交的年代。
-->勁掛住只有電視的那個年代。食完中午飯，下晝呃呀媽要做教育電視堂功課，睇完明珠台教育電視，再睇國際台教育電視，再接住睇閃電傳真機。
-->勁掛住星期五，閃電傳真機讀出細路寄比兒童節目主持的來信。(我諗寫信呢個環節已經隨著上網問功課環節上場已幻滅。)
-->勁掛住TBB有張潔蓮姐姐同蓋世寶姐姐，亞洲亞洲有袁潔儀姐姐的那個年代。
大家記唔記得，好多卡通片都冇啦啦cut 左，冇播到結局架。我好記得美少女轉身變，係變走左個結局架，細細個冇得睇結局真的好谷氣。我而家又會諗，其實而家D 細路，仲鐘唔鐘意譚玉瑛姐姐，譚玉瑛姐姐係兒童節目主持，我地係唔係應該問返而家D 細路，而唔係我地一廂情願的留住「我地年代」的譚玉瑛姐姐。(正如我地鬧政府唔發視牌比WIKI 王，唔重視觀眾民意。咁換兒童節目主持，又真係要問下D 靚仔喎。)
我地冇左譚玉瑛姐姐要遊行，係我地呢代人的意願，因為我地都怕冇左譚玉瑛，就冇左我地的回憶，我地都好自私的希望我地開心的童年，可以好似留住譚玉瑛咁留低。
PS. 話說回頭，譚玉瑛姐姐能做一份職業，做到街知巷聞，睇到大家欲罷不能，真的好厲害，佢留唔留低係TBB我都祝福佢。
其實好想TBB 訪問下而家D 細路的意見，定我太天真，而家D 細路個schedule 忙過翟近平，可能佢地根本冇時間「一齊分享睇電視的樂趣」。至於我自己，我為我童年可以睇卡通片睇到天昏地暗而感到十分高興，你有睇的話，你懂的。
原文載於姐死姐還在Facebook 專頁：
https://www.facebook.com/pages/%E5%A7%90%E6%AD%BB%E5%A7%90%E9%82%84%E5%9...