編按：作者阿豐為香港電視前飯堂厨師
首先我要自我介紹，我係香港電視裡面一個最基層嘅員工，我並唔係負責創作，亦唔係負責拍劇，更加唔係負責化妝，我只係公司職員canteen裏面一個負責煮飯嘅員工，我實在係睇唔過眼，所以對唔住我決定要響度鬧爆你。
你到底識唔識做生意㗎，你知唔知你其實唔駛蝕咁多㗎！你知唔知你請D員工返嚟原本唔駛比咁多錢㗎！佢地做創作嘅為左追尋夢想都習慣左一邊食面包或者杯麵一邊做創作啦！點解你要比佢地有溫飽，點解你要比佢地知道佢地嘅自身價值，要比佢地知道編劇仔都可以有尊嚴，佢地三餐無溫飽響D大台都習慣㗎啦！
你又知唔知你買嘅拍攝器材係唔駛咁貴㗎！你用到蔡司鏡頭咁高級，你係咪唔知果D係用嚟拍電影㗎！你用其他電視台用嚟拍劇嘅你知唔知可以慳好多！D觀眾只會覺得畫面靚左，鬼知你用到咁高級咩！
你知唔知你將一套拍左十幾廿集嘅劇集，為左緊湊同節奏感而將佢cut到淨返9集，你知唔知浪費左幾多錢同時間呀？你咪由得D觀眾睇垃圾囉！D觀眾咁多年都係咁㗎啦！咪由得佢地繼續雞汁送飯囉！
仲有，你飯堂賣到D野咁平做乜？16蚊個快餐，23蚊個即炒小菜仲要跟埋野飲，仲無得我用味精，你當呢度係善堂呀？咪由得D職員響出邊食味精捱貴飯囉！仲有果D劇組飯，點解要堅持三餸一湯日日唔同款，咪由得佢地響出邊餐餐燒味飯囉！都唔知你請我返嚟做乜？
上面我所講嘅只係冰山一角，但如果你做野求其D，小D理其他人感受，唔需要咁多創新，小D執著，小D良心，你知唔知你已經唔駛蝕9億幾，分分緊一半都搞掂，最後到我自己嘞！
你比我返朝8晚6，一個星期有一日星期六／日放假，你知唔知我做飲食係甚少返咁好嘅時間，我多左好多時間陪屋企人，我以前不嬲個女返左學我先起身，放工個女就一早瞓左，想見下都無，星期六／日想陪下D仔女去街就更加唔駛旨意，你比咁好時間我你叫我點返轉頭，我點捨得呢份工？
你一定要盡快搞掂個牌，記得揾返我，我一定會返嚟！到時慢慢同你計
一個小職員上