【獨媒報導】港超聯周六在旺角場上演「大比數交易」，東方5：0大勝晉峰，巴科爾梅開二度，後者頹勢未止，錄得聯賽十連敗。晉峰總教練何信賢在賽後向《獨媒》承認，球隊今季在招募教練、外援球員失敗：「喺招聘教練同外援球員方面我係失敗嘅⋯⋯但個目標係咪失敗呢？由球迷判斷，由球圈去判斷呢。究竟我呢個方向係咪錯，如果堅持落去係咪錯，我自己唔評論，由球迷去評論。」
兩隊今季際遇大不同，東方在上周六港超聯對傑志的比賽中，質疑球證判漏手球十二碼一事，球會高層周四與足總會面，足總裁判總監張炎有亦參與其中，一起翻看涉事片段。球隊今場由葉鴻輝把關，後防有賀爾、高素巴耶夫、丹尼爾及隊長黃梓浩，前場交由巴科爾、黃皓雋及馬希偉攻堅。
晉峰此前聯賽錄得九連敗，今年1月與來自韓國的主教練河赫俊解約，上場更不敵香港U23。球隊今場由龐焯熙任正選守門員，盡用六外援名額，包括梅田小太郎、李倫權、金賢昊、金相佑、奧廸加及文智星，何思哲任隊長，兼任教練的鄭璟昊為後備。
丹尼爾先拔頭籌 東方半場領先三球
上半場東方攻勢一面倒，晉峰在應對罰球的時候亦欠佳。6分鐘，余在言右路處理罰球，丹尼爾遠柱得手，替東方先開紀錄1：0。24分鐘，高素巴耶夫傳予馬高斯，後者禁區內轉身起腳射入，東方領先至2：0。40分鐘，余在言又一次處理罰球，巴科爾門前頭球搞掂，東方半場已贏到3：0，這亦是上半場的比分。
下半場換邊，戰至52分鐘，巴科爾單刀被金賢昊踢跌，球證黃偉倫判罰黃牌並直指十二碼。巴科爾操刀射入，替東方擴大比數4：0，兼個人梅開二度。
林樂賢收死葉鴻輝 球證翻看片段後改判入球無效
60分鐘，馬高斯後場直線傳予巴科爾，後者斜傳左路插上的黃皓雋，後者起腳卻射中龐焯熙。69分鐘，巴拉克殺入禁區起腳，為東方射成5：0。東方其後一口氣換入梁冠聰、黃浩然、于楊及李俊霆。88分鐘，晉峰一次機會，林樂賢遠射收死葉鴻輝，球證黃偉倫在翻看視像助理裁判片段，改判入球無效。
今場入場人數為476人，港隊主教練安達臣與足總技術總監莫寧繼續入場觀戰。在比賽後，有晉峰球員一度包圍球證理論，欲就入球被判無效反映意見。
余在言冀替東方全力搶分 劍指聯賽頭三
余在言當選今場最佳球員，他向《獨媒》表示，希望能替球隊在餘下比賽全力搶分：「希望喺呢五、六場裡面可以攞到最多分，呢個係重要。」
在現時港超聯爭標形勢，理文、傑志及大埔三強鼎立，被問到今季的目標，余在言表明劍指頭三：「我自己目標想頭三，但呢啲嘢我覺得唔應該話要頭幾，唔應該睇呢啲嘢，攞到最多分就嘗試攞。」
死球失球問題未解決 何信賢：絕對唔可以接受
在錄得十連敗後，何信賢在賽後喚職球員圍圈，並勉勵一番：「只有靠你哋自己去解決問題，四年全職成績最唔好嘅一年，但唔代表冇能力去改善目前情況，如果放完手腳，就唔係職業足球員嘅態度，我哋全部人都唔可以喺足球圈立足。」他希望球員能反思：「努力練習，解決宜家嘅困境，每一個球員、教練返屋企都好好檢討呢場波，諗吓點解會犯呢啲錯，有乜嘢可以改善。」
問到今場大敗的原因，何信賢對記者稱，球員技術不足，尤其遭對手連番以死球入波：「我相信球員係無放棄⋯⋯無一刻係放棄過，只係究竟點樣去解決個問題⋯⋯⋯我相信每一個教練、球員都係長期思考呢個問題。」
然而，何信賢表示，球員必須思考為何常常在死球失球：「當然人哋有好靚嘅傳送，但係咪可以去阻截到佢呢？呢個都要我哋去深究⋯⋯練習有練，但奈何做唔到我哋效果。」他透露，球隊今場希望循地面進攻，但在重要關頭卻屢次傳失波，「對一隊職業隊嚟講係絕對唔可以接受」。
承認外援水平不足 望多予機會本土球員發揮
《獨媒》問到今季對晉峰來說，是否一個失敗的球季。何信賢稱球隊教練在開會的時候亦曾討論：「我哋呢個球季算失敗，抑或係差？」何信賢指與河赫俊初時曾有蜜月期，但及後發生了不能接受的事情：「只可以講係，我哋嘅開始到進步嗰一刻，係出咗問題。」
除了主教練的問題，何信賢亦承認外援水平不足以支撐本地球員：「所以有時好多場合，我哋都係出本土球員，唔出外援球員，我始終都係想畀班本土球員發揮。」
《獨媒》追問晉峰來季去向，作為球隊總教練的何信賢在回應的時候一度哽咽：「到呢一刻，我都好努力去搞好晉峰⋯⋯外在嘅因素我控制唔到。但可以承諾畀班球迷聽⋯⋯仲有360分鐘喺度，我會努力。」
記者：麥馬高、周頌謙