昨晚一位香港老友新居搞入伙酒，我應邀赴港出席，新居在上水，位置遠離市區，且是二手盤，但對香港人來說，買到一間泗泗正正、馬桶不在床頭旁邊的私樓已非常不錯。
邊食飯邊開住電視，正直播《2018香港小姐競選》……
「轉台啦，睇港姐咁無聊，啲女質素越來越差，好多連廣東話都未講得正。」賓客甲提議轉台。
「直頭柒啦，今年cheap到去澳門拍外景，曾志偉都串佢，根本為搞而搞，成班圍威喂，一早內定結果。」賓客乙附和著。
本來我是中立，轉不轉台都無所謂，但想起上屆冠軍是由Do姐選出來的雷莊兒，心想還是轉台吧。
但還未開口，香港老友就回應：「有得睇就睇啦，過多幾年可能連港姐都冇得選。」
眾人眼神疑惑，賓客乙先出聲：「點會呀，除非CCTVB執粒啦，唔係實會繼續選。但叫得CCTVB，點會執。」
香港老友不屑地笑了一笑，「就係因為佢叫CCTVB，先有可能冇得再選港姐，要政治正確嘛。」WHAT？選港姐啫，又不是普選特首，關政治正唔正確咩事？
香港老友繼續講：「689哥班友仔都話遲啲再冇分香港人，只有大灣區人，既然冇香港人，仲選乜香港小姐？遲早叫做《大灣區小姐競選》，好少少就叫《大灣區小姐競選 — 香港站》，話唔定今屆冠軍，就係末代港姐啦。」
各賓客都未來得及反應，香港老友加多句：「依家乜都話大灣區，9+2溝埋一齊係遲早嘅事，我係上水買樓，除左貪價錢平啲，仲有北上去深圳、東莞呢啲大灣區城市都方便啲。為咗生計，有乜計？」
眾人：……………………
回澳船程上，濛濛雨點中望到港珠澳大橋，這項世紀工程快將通車，溝埋一齊又近一步。朋友，你有冇計？如果冇計，就請珍惜這刻還有《香港小姐競選》..