其實除咗陳雲，大家都無講一樣嘢：嚟香港生仔，係最平嘅移民手段！
居港權之所以值錢，係因為傳說中而家香港遍地黄金，福利又超好，所以依然遠比大陸值得居住。當然，呢個係傳說，但香港的確比大陸安定，工資較高，更自由，更好福利。所以大陸孕婦來港產子嘅需求極大，而私家醫院床位供應有限，收費增幅依然未加到供求平衡嘅水平，所以就供不應求。呢啲會考econ，想必大家都可以理解。
咁而家因為香港人真係接呢啲孕婦接到怕，要解決呢個供求問題，又可以點做？最廢嘅廢話，就係加強巡查，因為而家嘅巡查已經相當嚴，但依然無辦法舒緩問題；又所以痰罐宗話返大陸陳情，都係廢嘅，因為大陸只能承諾加強巡查同審批，即係乜都無變。
而根據會考econ嘅level，我諗得出嘅方法有幾個：
1. 減少婦產科床位quota。而家公立醫院嘅quota已經減得好少，所以更進一步，應該連私家醫院婦產科嘅quota都納入規管，並最少cut一半。當然，咁絕對阻唔到寧願入急症都要嚟香港生仔嘅大陸孕婦，但就我所知，呢類大陸孕婦唔會好多。(我女友福建出世，嚟香港十幾年，但都有好多大陸親戚，當中有幾對嚟香港生仔，都係book私家床位，book唔到就好可能唔會落嚟生...)不過，政府呢個時候又會話，咁樣係干預市場自由，削弱經濟競爭力......
2. 大加非本地孕婦嘅接生價，卽係set一個好高嘅price floor，而且必須落五成訂金。如果生一次仔就要五六十萬，仲要預先俾一半訂，呢筆錢當然好少人出到。不過，都係嗰句，政府呢個時候又會話，咁樣係干預市場自由，削弱經濟競爭力......
3. 最有效嘅絕招，係直頭唔賣居港權呢種貨。修改基本法，改到有關條文同澳門一樣，又或者釋法，雙非父母來港生仔，仔女都唔會有三粒星！居港權呢種貨，港府獨家供應，只要佢唔賣/唔准佢賣，就無生意做。不過，修改基本法，會令阿爺擔心以後仲會繼續改，萬一改改下變成香港官員唔駛中央任命，唔可以有駐港解放軍之類，咁咪無得控制香港？至於釋法，真係弊多於利，皆因人大出手破壞法治，就盞香港快啲冧......
歸根究底，要解決呢個供求問題其實好簡單，可惜簡單唔代表容易，因為政府同中共都唔想呢啲解決方法真正出現。所以，又變成一個政治問題。香港真正嘅大難題，在於港府自綁雙腳，仲有中共綁埋佢對手，所以乜嘢問題都解決唔到，連食飯大小二便同刷牙洗面都要跪求阿爺幫手。大陸孕婦，只係其中一樣後果。